Abituriyent qanday hollarda majburiy fanlar bo‘yicha belgilangan eng yuqori ballga ega bo‘lishi mumkin?

Umumta’lim fanlarini bilish darajasini aniqlash va davlat namunasidagi sertifikatni berish Bilim va malakalarni baholash agentligi tomonidan to‘lov asosida  amalga  oshiriladi, sertifikat  elektron  shaklda   beriladi. Sertifikat berish uchun talabgordan ariza berilgan kundagi bazaviy hisoblash  miqdorining 1,5 baravari  miqdorida  to‘lov   undiriladi.

Mavjud qonunchilikka ko‘ra, umumta’lim fanlarini bilish darajasini baholashning milliy test sinovlarida ishtirok etish bo‘yicha murojaatlarni O‘zbekiston Respublikasi Yagona interaktiv davlat xizmatlari  portali orqali  elektron  shaklda  qabul  qilinishi  belgilandi.

AOKA da o‘tkazilgan brifingda Bilimni baholash agentligi direktori maslahatchisi Farhod Mirzayevning ma’lum qilishicha,  davlat xizmati ko‘rsatilishi uchun ro‘yxatdan YAIDXP orqali o‘tilganligi sababli talabgordan  belgilangan  to‘lov  miqdorining 90 foizi  undiriladi. “Ijtimoiy himoya yagona reyestri” axborot tizimida ro‘yxatga olingan shaxslarga, shuningdek, I va II guruh nogironligi bo‘lgan shaxslarga  mazkur davlat xizmatini ko‘rsatishda belgilangan to‘lovning 50 foizi miqdorida chegirma  qo‘llaniladi.

Qayd etilishicha, test sinovini o‘tkazish sanasi u o‘tkaziladigan kundan kamida yetti kun oldin  YAIDXP  orqali e’lon qilinadi. Talabgor test sinovi  o‘tkaziladigan sana va joy to‘g‘risidagi ma’lumotga YAIDXP  orqali  ega bo‘ladi.

Agar ariza beruvchi turli sabablarga  ko‘ra test sinovlarida ishtirok eta olmaydigan bo‘lsa, Agentlikka test sinovlari o‘tkaziladigan kundan kamida uch kun  oldin  YAIDXP  orqali  elektron  shaklda  murojaat   etishi lozim. Uzrli sababga ko‘ra, (kasalligi yoki oila a’zolarining vafot  etganligini tasdiqlovchi hujjatni taqdim  etganda) test sinovlarida qatnasha olmagan talabgor test sinovi o‘tkazilgan sanadan besh ish kundan kechikmay, ushbu holatni tasdiqlovchi hujjatlarni YAIDXP orqali Agentlikka elektron shaklda  taqdim  etishi kerak.

Fuqaroligi bo‘lmagan shaxslar va  chet   el  fuqarolari Adliya vazirligi  tomonidan vaqtincha ro‘yxatga olinadi hamda ular uchun JSHSHIR raqami shakllantiriladi. Bunda 16 yoshga to‘lmagan shaxslar ID-karta yoki xorijga chiqish pasporti orqali ro‘yxatga  olinadi.

Baholash mezonlariga ko‘ra, umumta’lim fanlarini  bilish  darajasini  aniqlash  bo‘yicha  A+, A, B+, B, C+, C, darajali  sertifikatlar  beriladi.

Test natijalari xalqaro metodika —RASH modeli asosida  hisoblanadi. Unga  ko‘ra, 70 balldan yuqori  ball olgan  talabgorga  A+ daraja, 65 — 69,9 ball  olgan  talabgorga   A  daraja, 60 — 64,9 ball  olgan  talabgorga   B+ daraja, 55 — 59,9 ball  olgan  talabgorga  B daraja, 50 — 54,9 ball olgan  talabgorga   C+ daraja hamda 46 — 49,9 ball olgan  talabgorga  C darajali  sertifikat  beriladi.

Sertifikat 3 yil muddatga  beriladi. Bunda: A+, A darajali sertifikat olgan abituriyentlarga oliy ta’lim muassasasi bakalavriatiga o‘qishga qabul qilish bo‘yicha test sinovlarida ushbu fandan belgilangan maksimal ball  beriladi.

B+, B, C+, C, darajali sertifikat olgan abituriyentlarga mos ravishda sertifikatdagi umumiy  ballga nisbatan foiz asosida oliy ta’lim muassasasi bakalavriatiga o‘qishga qabul qilish bo‘yicha test sinovlarida ushbu fandan belgilangan maksimal ballga nisbatan  tabaqalashtirilgan (proporsional) ball  taqdim etiladi.

Milliy  sertifikatga ega bo‘lgan abituriyentlar  tegishli  majburiy fanlar bo‘yicha  belgilangan  eng  yuqori ballga ega bo‘lishadi.

Muhayyo Toshqorayeva, O‘zA