Елимизде жақынласып атырған Наўрыз байрамы мүнәсибети менен халық ҳәм туристлер ушын бир қатар қолайлықлар жаратылмақта.

Байрам күнлеринде мәмлекетимиздеги мәдений мийрас объектлери, музейлер ҳәм туризм хызметлеринде ҳәр қыйлы шегирмелер және арнаўлы усыныслар енгизилиўи режелестирилген.

Мәлим етилиўинше, усы жылы 21-март – Наўрыз байрамы мүнәсибети менен Мәдений мийрас агентлиги ҳәм “Вақф” қайырқомлық жәмийетлик фондына қараслы мәдений мийрас объектлери, сондай-ақ, туризм тараўында жумыс алып барып атырған исбилерменлик субъектлери тәрепинен халық ҳәм туристлер ушын бир қатар шегирмелер усынылады.

Атап айтқанда, байрам күнлери “Вақф” қайырқомлық жәмийетлик фондына бириктирилген зыярат етиў орынларында белгиленген прейскурант бойынша кириў баҳаларына 10 процентлик шегирме берилиўи режелестирилген.

Сондай-ақ, мәдений мийрас объектлери ҳәм мәмлекетлик музейлерге кириў билетлерине шегирмелер жәрияланады.

Буннан тысқары, туризм тараўындағы исбилерменлик субъектлери тәрепинен мийманханалар, мийман үйлери ҳәм басқа да жайластырыў қуралларында 20 процентке шекем арнаўлы байрам шегирмелери ықтыярлы түрде усынылмақта. Бул болса жергиликли ҳәм сырт елли туристлерге Наўрыз байрамын мәмлекетимиздиң түрли аймақларында мазмунлы өткериў имканиятын жаратады.

Соның менен бирге, Мәденият министрлиги қарамағындағы Қарақалпақстан Республикасы, ўәлаятлар ҳәм Ташкент қаласындағы мәмлекетлик театрларда театр ықласбентлери 21-27-март күнлери “Театр тамашалары ҳәптелиги” шеңберинде көрсетилетуғын спектакльлерди бийпул тамаша етиўи мүмкин. Буның ушын ашық кассалардан мирәтнамалар алыў талап етиледи.

Муҳайё Тошқораева, ӨзА