Өзбекстан Республикасы инвестициялар, санаат ҳәм саўда министри Лазиз Қудратов Брюсселде Европа Комиссиясы, тийисли министрликлер ҳәм уйымлардың басшылары, сондай-ақ, усы мәмлекеттиң исбилермен топарларының ўәкиллери менен ушырасыўлар өткерди.

Сөйлесиўлер даўамында инфраструктура, энергетика ҳәм байланыс тараўларындағы жойбарлар, сондай-ақ, ири еки тәреплеме илажлар ҳәм халықаралық экономикалық форумларға таярлық темалары додаланды.

Жасыл экономика, турақлы логистика ҳәм жаңа тармақларға инвестиция тартыў мәселелерине айрықша итибар қаратылды.

Ноябрь айында Ташкент ҳәм Брюсселде саўда миссияларын өткериў бойынша келисимге ерисилди. Бул әнжуманлар шеңберинде мәмлекетлик структуралар ҳәм бизнес ўәкиллери менен әмелий бирге ислесиўди беккемлеўге қаратылған ушырасыўлар шөлкемлестириледи. Еки тәреп компаниялары фармацевтика, санлы технология, капитал базары, транспорт ҳәм инновациялық медицина бағдарларындағы шериклик перспективасын таллайды.

Болып өткен сөйлесиўлер Европа Аўқамы ҳәм Белгия Өзбекстан менен шериклик көлемин буннан былай да кеңейтиў, жаңа биргеликтеги жойбарларды әмелге асырыўға таяр екенин көрсетти.

Г.Сатторова, ӨзА