Егислик майданларда гүзги шүдигарлаў жумысларын шөлкемлестириў, мол зүрәәтке тийкар жаратады. Сонлықтан да, ҳәзирги ўақытта аўыл хожалығы егинлери ушын белгиленген атызларды шүдигарлаў жумыслары қызғын даўам етпекте.
Мәмлекетимиздиң суўғарылатуғын майданларында аўыл хожалығы егинлеринен аз шығын менен, мол ҳәм сапалы зүрәәт жетистириўде топыраққа тийкарынан топырақты қайта ислеў, яғный гүзги шүдигарлаў үлкен әҳмийетке ийе. Жерлерди сапалы шүдигарлаўға таярлаў ушын трактор ҳәм плуглар алдыннан жумысқа таяр ҳалатқа келтирилиўи ҳәм сазланыўы, ал атызлар сүримге таяр болыўы зәрүр.
Бул агротехникалық илаж тек ғана гүз мәўсиминде әмелге асырылады. Гүзги шудигарлаўды сапалы өткериў ушын биринши гезекте атызлар ғаўаша ҳәм басқа өсимлик қалдықларынан тазаланыўы, суўғарыў салмаларының тегислениўи, топыраққа зәрүр муғдарда жергиликли ҳәм минерал төгинлер төгилиўи мақсетке муўапық болып табылады. Шоры жуўылмаған майданларға минерал төгинлер шүдигардан алдын қолланылмайды.
– Аўыл хожалығында егинлерден жоқары ҳәм сапалы өним алыў ең алды менен егилген майданның өнимдарлығына байланыслы. Буған байланыслы ең зәрүрли агротехникалық илажлардан бири тийкарынан топырақты қайта ислеў, яғный шүдигарлаў есапланады,-дейди Аўыл хожалығы министриниң биринши орынбасары А.Козиев.
Шүдигарлаў топырақтың барлық қәсийетлерине: агрофизикалық, агрохимиялық, биологиялық өзгешеликлерине унамлы тәсир ететуғын процесс болып, бул ўақтында ҳәм сапалы әмелге асырылса топырақтың көлем массасы, ҳаўа алмасыўы, микробиологиялық процесслери сезилерли дәрежеде жақсыланады.
Шүдигарлаў жумысларын сапалы шөлкемлестириў мақсетинде быйылғы жылы Қарақалпақстан Республикасында 2025-жылдың өними ушын 85 мың гектар жер майданларда гүзги шүдигарлаў жумысларын алып барыў режелестирилип, оларға 138 отряд бириктирилди.
Усы отрядларға 608 жоқары өнимли сүрим тракторлары берилип, бул жумыслар бүгинги күнге келип, 72 мың гектар егислик майданларда әмелге асырылды. Өз гезегинде бул жумысларды толық орынлаў мақсетинде егислик майданларда шүдигарлаў жумыслары даўам етпекте.
Ә.Жийемуратов,
Қарақалпақстан хабар агентлиги