Қарақалпақ спорты тарийхында елимиз байрағының бәлентлерге көтерилиўинде көплеген спортшылардың тутқан орны бар. «Устазы жақсының устамы жақсы» дегениндей, спортшылардың жақсы нәтийжелерди қолға киргизиўинде әлбетте, устаз—тренерлердиң мийнетлери салмақлы. Пайтахтымыз Нөкис қаласында Қарақалпақстан Республикасы спорт министрлиги тәрепинен спорт тараўын раўажландырыў ҳәм жасларды ўатансүйиўшилик руўхында тәрбиялаўға үлес қосқан ветеран спортшыларымызды сыйлықлаў мәресими болып өтти.
«Жаслар ҳәм бизнести қоллап қуўатлаў» жылында әмелге асырылған салмақлы жумыслар, устаз-тренерлердиң шәкирт таярлаўда тутқан орны, сондай-ақ, жаңа жыл қарсаңында дастурхан дөгерегинде сәўбетлесиў түринде өткерилген илажда шығып сөйлеўшилер Президентимиз тәрепинен спорт тараўына қаратылып атырған имканиятлар, тараўдағы жақсы нәтийжелер, жасларымызды спортқа тартыў ҳәм оларды қоллап-қуўатлаў сондай-ақ, устаз-шәкирт системасын және де жетилистириў бойынша пикирлерин билдирди. Илажда Қарақалпақстан Республикасы спорт министри А. Алланазаров қатнасып, ветеран устазларға миннетдаршылығын билдирди.
Қарақалпақстан хабар агентлиги