Пүткил жер жүзилик таэквондо федерациясы (WТ) 2024-жылдың ең жақсыларын анықлаў ушын спортшылар ҳәм тренерлердиң даўыс бериў нәтийжелерин жәриялады.
Даўыс бериў нәтийжелерине бола, жылдың ең жақсы ер адам спортшысы номинациясында миллий сайланды командамыз ағзасы, еки мәрте Олимпиада ойынларының алтын медальы ийеси Улуғбек Рашитов жеңимпаз болды. Сыйлықлаў мәресими бүгин Гонконгта даўам етип атырған пумсе бойынша Жәҳән чемпионаты шеңберинде болып өтти.
Онда Улуғбек Рашитов та қатнасып, Пүткил жер жүзилик таэквондо федерациясының бас хаткери Сеа Жеонгкангтан өз сыйлығын қабыл етип алды.
Бул өзбек таэквондосының жарқын жеңисине айланғанын атап өтиў керек. Себеби, буған шекем жоқары нәтийжелерге ерискен спортшыларымыз дүнья көлеминде тән алынбаған еди.
Жавоҳир Тошхўжаев, ӨзА