26-27-ноябрь күнлери Әжинияз атындағы Нөкис мәмлекетлик педагогикалық институтында спорттың волейбол түринен ерлер ҳәм ҳаял-қызлар арасында Қарақалпақстан чемпионаты болып өтти.
Қызғын беллесиўлерге бай болған жарыс жуўмағында, ерлер арасында Бердақ атындағы Қарақалпақ мәмлекетлик университети командасы биринши орынды ийелеп, Қарақалпақстан чемпионы атағына миясар болды.
Ал, сыйлы екинши ҳәм үшинши орынларды Республикалық ойын түрлери ҳәм жеңил атлетика спорт түрлерине қәнигелестирилген спорт мектеби ҳәм Беруний районы командалары жеңип алды.
Қызлар арасында өткерилген беллесиўлерде болса, биринши орынды Нөкис қаласындағы 1-санлы спорт мектебиниң командасы ийелеўге миясар болды.
Сыйлы екинши ҳәм үшинши орынлар Республикалық ойын түрлери ҳәм жеңил атлетика спорт түрлерине қәнигелестирилген спорт мектеби ҳәм Мойнақ районы командаларына несип етти.
Жарыс соңында жеңимпаз командалар шөлкемлестириўшилер тәрепинен таярланған арнаўлы диплом ҳәм медальлар менен сыйлықланды.
Адилбай Оразов,
Қарақалпақстан хабар агентлиги шолыўшысы