Соңғы жыллары елимизде илим ҳәм билимлендириў тараўын раўажландырыўға айрықша итибар қаратылмақта. Соның ишинде, әсиресе, сырт ел жоқары оқыў орынлары менен бирге ислесиў Меморандумы тийкарында оқыў-методикалық, илим-изертлеў ҳәм тәжирийбе алмасыў жумыслары әмелге асырылмақта.
Усындай жоқары оқыў орынларының бири Қазақстан Республикасының Шымкент қаласында жайласқан Мухтар Әўезов атындағы Қубла Қазақстан университети болып, бул университет дүнья жүзиндеги Топ 1000 лыққа киретуғын университетлердиң бири есапланады.
Усы жылдың 11-23 ноябр күнлери Бердақ атындағы Қарақалпақ мәмлекетлик университетиниң биология факультети деканы, биология илимлериниң докторы, профессор Якуб Аметов ҳәм улыўма биология ҳәм физиология кафедрасының доценти Муратбай Бегжановлар М. Әўезов атындағы Қубла-Қазақстан университетинде хызмет сапарында болды.
-Хызмет сапарынан гөзленген тийкарғы мақсет – Топ 1000 лыққа кирген университет студентлерине лекция оқыў арқалы Қарақалпақ мәмлекетлик университетиниң рейтингин жоқарылатыў болып табылады,-дейди биология илимлериниң докторы, профессор Якуб Аметов.-Сондай-ақ, усы университеттиң биотехнология, экология ҳәм биология кафедралары менен тәжирийбе алмасыў, оқыў, илим-изертлеў жумысларын беккемлеў ҳәм раўажландырыўдан ибарат. Хызмет сапарының дәслепки күни жерлеслеримиз университеттиң академиялық мәселелери бойынша проректоры, профессор Қурманғалы Саркулов, «Химиялық инженерия ҳәм Биотехнология» жоқары мектебиниң деканы, доцент Мурат Айтуреев, сондай-ақ, «Биотехнология» кафедрасының баслығы, доцент Гулжайна Алпамысовалар менен ушырасты.
Ушырасыўда еки университет профессор-оқытыўшылары, студентлери, магистрант ҳәм докторантлары арасында академиялық мобилликти жолға қойыў, оқыў ҳәм илимий жумысларды раўажландырыў бойынша ҳәм алдағы исленетуғын жумыслар ҳаққында келисип алды.
Хызмет сапары даўамында профессор Якуб Аметов ҳәм доцент Муратбай Бегжановлар университеттиң 2-3 курс студентлерине «Микробиология» ҳәм «Экология» пәнлеринен сабақ өтти.
Адилбай Оразов,
Қарақалпақстан хабар агентлиги шолыўшысы