Хабарыңыз бар, Қарақалпақстан Республикасы Денсаўлықты сақлаў министрлиги ҳәм Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңесиниң шөлкемлестириўи менен медицина хызметкерлери арасында саламат турмыс тәризин қәлиплестириў, оларды спортқа кеңнен тартыў мақсетинде спорттың шахмат, шашка, стол тенниси, киши-футбол түрлери бойынша спартакиада шөлкемлестирилип, жеңимпазлар анықланған еди.
Мине, усы спартакиада спорт жарысының кейинги басқышы Өзбекстан Республикасы көлеминде «Денсаўлықты сақлаў министри кубоги — 2024» спорт жарыслары болып өтти.
Ташкент қаласында министр кубоги ушын өткерилип атырған жарысларда қарақалпақстанлы бир қатар медицина хызметкерлери де белсене қатнасып, сыйлы орынларды ийеледи.
Усы жарыслардағы спорттың шахмат түринен Әмиўдәрья районлық медицина бирлеспесиниң хызметкери Жәҳәнгир Еримбетов сыйлы 3-орынды ийеледи. Ал, стол тенниси бойынша ер балалар арасында 2-орынды Абдулазиз Юлдашов (Әмиўдәрья районлық медицина бирлеспеси) ийелеген болса, қызлар арасында 3-орынға Луиза Алиева (Нөкис қаласы медицина бирлеспеси) мүнәсип деп табылды.
Киши-футбол бойынша жарыслар да қызғын беллесиўлерге бай болды. Шымбай районлық медицина бирлеспесинен дүзилген команда финал басқышына шықты. Бул команда финал басқышында Сырдәрья ўәлаятының командасынан жеңилип, екинши орынды ийеледи. Үшинши орын Самарқанд ўәлаяты командасына несип етти.
Денсаўлықты сақлаў системасы хызметкерлери арасында спорттың киши-футбол, стол тенниси, шахмат ҳәм шашка түрлери бойынша өткерилип атырған жарыстың республикалық басқышы жеңимпазлары кубок, диплом ҳәм баҳалы саўғалар менен сыйлықланды.
Ә.Жийемуратов,
Қарақалпақстан хабар агентлиги