Студентлер менен тығыз бирге ислесиўди жолға қойыў, олардың пикир-усынысларын тыңлаў, оқыў барысында дусласып атырған машқалаларын анықлап, өз ўақтында сапластырыў мақсетинде, Өзбекстан мәмлекетлик денетәрбиясы ҳәм спорт университети Нөкис филиалында директордың орынбасарлары, бөлим баслықлары, факультет деканы, тюьторлар ҳәм студентлердиң қатнасыўында «Директор ҳәм жаслар» ушырасыўы болып өтти.
Ушырасыўда филиал директоры, профессор Б.Еримбетов оқыў орнының ишки имканиятлары, спорт заллары, оқыў ханалары, халықаралық бирге ислесиўлер, зийрек студентлерге илимий басшы бекитиў арқалы мақала ҳәм тезислер жазыўды үйретиў, атақлы мәмлекетлик степиндияларды алыў тәртиби Азия ҳәм Жәҳән чемпионларына берилетуғын жеңилликлер, Өзбекстан Республикасы Президентиниң 2023-жыл 25-декабрь күни «2024-2026-жылларда Өзбекстан Республикасының социаллық ҳәм өндирислик инфраструктурасын раўажландырыў илажлары ҳаққында»ғы қарары тийкарында филиал студентлери ушын 2025-жылы мәмлекетлик шериклик тийкарында 400 орынлық студентлер жатақханасының қурылысы басланатуғынлығы ҳаққында мағлыўматлар берди.
Сондай-ақ, ижарада жасаўшы студентлердиң жағдайларынан хабар алыў, жүз бериўи мүмкин болған өрт ҳәм газ ийисинен зәҳәрлениўди болдырмаў бойынша жуўапкерлерге тапсырмалар берди.
Ушырасыўда студентлер филиал басшыларынан өзлерин қызықтырған сораўларына жуўап алып, өзлериниң пикир-усынысларын билдирди.
Адилбай Оразов,
Қарақалпақстан хабар агентлиги шолыўшысы