Мәмлекетимизде әмелге асырылып атырған кең көлемли реформалар шеңберинде жаслар арасында саламат турмыс тәризин үгит-нәсиятлаў, олардың нәшебентлик қураллары ҳәм психотроп затларға қарсы иммунитетин қәлиплестириў, сондай-ақ, инсан саламатлығын тәмийинлеўге қаратылған жумысларға айрықша итибар қаратылмақта.
Шоманай районы Наўрыз мәкан пуқаралар жыйыны аймағындағы 16-санлы улыўма орта билим бериў мектебинде Өзбекстан Республикасы Президентиниң 2024-жыл 6-майдағы «Өзбекстан Республикасында нәшебентлик затларды ҳәм психотроп дәрилердиң нызамға қарсы айланысына шек қойыў ҳаққында»ғы пәрманының мазмун-мәнисин түсиндириў бойынша илаж өткерилди.
Илажда районлық Ишки ислер бөлими баслығының орынбасары, подполковник А.Елмуратов, Шаңарақ ҳәм ҳаял-қызлар бөлиминиң баслығы Т.Қаллықыличева, Мектепке шекемги ҳәм мектеп билимлендириўи бөлиминиң психологи О.Шалабаев, мәҳәлле ҳаял-қызлар белсендиси Б.Қуденовалар шығып сөйлеп, жасларға психотроп затлардың нызамсыз айланысының ерте алдын алыў, халықтың оларды пайдаланыўға қарата иммунитетин қәлиплестириў арқалы генофондымызға унамсыз тәсир көрсетиўши факторларды сапластырыў, нәшебентлик затларды пайдаланбаў бойынша әмелге асырылып атырған илажлар туўралы мағлыўматлар берилип, түсиник жумыслары алып барылды.
– Ҳәзирги ўақытта район ҳәкимлиги ҳәм тийисли шөлкемлер менен биргеликте пуқаралар, әсиресе, жаслар ҳәм ҳаял-қызлар арасында ҳуқықбузарлықтың алдын алыў, нәшебентликке қарсы гүресиў, нәшенбентлик затлардың тарқатылыўы ҳәм тасылыўының қатнасыўшысы болып қалмаўы ушын кең көлемли профилактикалық үгит-нәсият илажлары алып барылмақта. Әсиресе, кем тәмийинленген, жәрдемге мүтәж бағыўшысын жоғалтқан шаңарақларға барылып оларда тәрбияланып атырған жас өспиримлердиң тәрбиясына итибар қаратылмақта,-дейди Шоманай районы ИИБ ҳаял-қызлар мәселелери бойынша аға инспекторы Г.Бекманова.
Илаж даўамында жаслардың пикир-усыныслары да тыңланып, олар қәнигелерден өзлерин қызықтырған сораўларға жуўап алды.
Бул бағдардағы илажлар орынларда даўам етпекте.
Ә.Жийемуратов,
Қарақалпақстан хабар агентлиги