Қарақалпақстан Республикасы Жоқарғы Кеңесиниң Баслығы А.Орынбаев Нөкис районындағы социаллық ҳәм исбилерменлик объектлери менен танысып, пуқаралар менен пикирлести.
Дәслеп Саманбай аўыл пуқаралар жыйынындағы жақында иске түсиў алдында турған «Nukus Broiler» жуўапкершилиги шекленген жәмийетиниң жумыслары менен танысты. Жуўапкерлерге кәрхана жумысларын жолға қойыўда жәрдем көрсетиў бойынша тапсырмалар берилди. Бул жерде улыўма 30 миллиард сум қаржы тийкарында таўық гөши ҳәм мәйек жетистириў режелестирилген болып, арнаўлы үскенелер Қытай, Дания, Нидерландия, Канада, Түркия мәмлекетлеринен алып келинген. Жәмийетте 480 мың шөже бағыў режелестирилмекте.
Буннан соң, Жоқарғы Кеңес Баслығы район орайындағы Дарсан мәкан пуқаралар жыйынында Президентимиздиң тапсырмасы менен қабыл етилген Министрлер Кабинетиниң қарары тийкарында ишки хожалық жолларын оңлаў жумыслары менен жақыннан танысты. Бул жерде аймақ турғынлары менен пикирлесип, машқалалар басқышпа-басқыш өз шешимин табатуғынлығы атап өтилди. Өз гезегинде, нуранийлер өзлериниң пикир-усынысларын билдирип, халықтың турмысын жақсылаў бойынша ийгиликли жумыслардан Президентимизден миннетдар екенлигин билдирди.
«Жасыл мәкан» улыўма миллий жойбары шеңберинде терек егиў, сондай-ақ, Тоғай хожалығы ҳәм Абаданластырыў басқармасы питомниги жумыслары да барып көрилди. Гүзги терек егиўге жерлерди ҳәм нәллерди таярлаў, бул бағдардағы жумысларды шөлкемлескенлик пенен алып барыў, питомниклерди кеңейтиў ушын жер майданларын ажыратыў бойынша тапсырмалар берилди.
Сондай-ақ, райондағы ең шетки аймақлардың бири есапланған Ақтерек пуқаралар жыйынындағы көп қабатлы жайлар көзден өткерилип, пуқаралардың машқалалары тыңланды. Аймақ турғынларының мүрәжатлери бойынша 11 хожалық жасайтуғын көп қабатлы турақ жайдың қыстан зыянсыз шығыўын тәмийинлеў мақсетинде имараттың төбесин шиферлаў, ысытыў системаларын оңлаў ҳәм басқа да қурылыс жумысларын тез арада баслаў, буның ушын талап етилетуғын қаржыларды қысқа мүддетте ажыратыў бойынша жуўапкерлерге анық тапсырмалар берилди.
Қарақалпақстан хабар агентлиги