20-22-сентябрь күнлери Наманган ўәлаятында спорттың белбеўли гүрес түри бойынша 2004-2005-жыллары туўылған ерлер ҳәм қызлар арасында Өзбекстан чемпионаты болып өтти.
Оған мәмлекетимиздиң барлық аймақларынан палўанлар қатнасты.
Қызғын беллесиўлерге бай болған бириншилик жуўмағында, қарақалпақстанлы спортшылар арасынан 48 кг салмақта М.Алимбаева, 66 кг салмақта С.Шаженова ҳәм 76 кг салмақта Л.Төлепбергеновалар барлық қарсыласларын жеңип шығып, Өзбекстан чемпионы атағына миясар болды. Ал, 52 ҳәм 76 кг салмақ категориясында беллескен Б.Қалмуратова менен А.Абдимуратовалар гүмис, 58 ҳәм 75 кг салмақта Ж.Қаразова ҳәм Ю.Шайқуловлар қола медалына ылайық деп табылды.
Чемпионат соңында жеңимпазлар шөлкемлестириўшилер тәрепинен арнаўлы медаль, диплом ҳәм естелик саўғалар менен сыйлықланды.
Адилбай Оразов,
Қарақалпақстан хабар агентлиги шолыўшысы