15-июльден берли Пайтахтымыз Нөкис қаласының «Дослық» каналы бойында даўам етип атырған «Шилле-талантлылар мәўсими» нде ҳәр күни гезеги менен Нөкис қаласы, Хожели, Нөкис, Кегейли, Шымбай, Қараөзек, Тахтакөпир, Қоңырат, Қанлыкөл, Шоманай районлары тәрепинен ҳәр қыйлы кеўилашар илажлар шөлкемлестирилип, шоу, концерт бағдарламалары қойып берилди. Ҳәр күни даўам етип атырған бул илажда мәденият ҳәм көркем өнер, модалар көргизбеси, жазғы кинотеатр, гастрономия, сүўретлеў көркем өнери бағдарлары бойынша повилонлар шөлкемлестирилип, тәжирийбели ҳәм жас өнерментлер, сүўретшилер, аспазлар ҳәм дизайнерлер өз өнерлерин көрсетип, өз-ара пикир ҳәм тәжирийбе алмаспақта.
Илажды өткериўдеги тийкарғы мақсет, жас талантлыларды жүзеге шығарыў, қоллап-қуўатлаў, олардың арасында өз-ара бирге ислесиў орталығын жаратыў, жәмлеспеген жаслар арасында социаллық пайдалы жумыс бойынша жаңа көнликпелерди қәлиплестириў ҳәм ғалаба ен жайдырыў, 7-30 жастағы оқыўшы ҳәм студент-жаслардың «Жаслар туризм айлығы»н өткериў арқалы саяхатын шөлкемлестириў болып есапланады.
-Концерт бағдарламасын көрип, тамашалап кеўилли дем алдық. Кешки Нөкис ақшамына жарасқан бул илаж кишкене балалардан баслап, үлкен жастағы кемпир-ғаррыларға шекем жақсы дем алыўы ушын имканиятлар жаратпақта. Әсиресе, өнерментлер ҳәм сүўретшилердиң көргизбелери өзгеше заўық бағышламақта,-дейди илаж қатнасыўшысы, пайтахтымыздағы «Нәўпир» мәкан пуқаралар жыйыны турғыны Г. Ниязова.
Күни кеше илажда “Дослық” каналы бойындағы арнаўлы мәденият ҳәм көркем өнер сахнасында Елликқала ҳәм Төрткүл районлық Мәденият бөлимлери жәмәәтлери усы мәдений илажда белсендилик көрсетип, халқымызға әжайып концерт бағдарламасын усынды.
Қала турғынларын ҳәм мийманларын усы жерге жәмлеп, ҳәр қыйлы шоу бағдарламаларын тамашалаўға, көркем өнер ғайраткерлери ҳәм жас атқарыўшылардың концерт бағдарламаларынан заўық алыўға, ойнап-күлип мәдений дем алыўына кең мүмкиншиликлер жаратып атырған мәдений илаж жоқары шөлкемлескенлик пенен даўам етпекте.
Бүгин Өзбекстан мәмлекетлик филармониясы Қарақалпақстан Республикасы бөлими сондай-ақ, Тақыятас, Нөкис районларының көркем өнер ғайраткерлериниң концерт бағдарламалары жыйналғанларға усынылады.
Қарақалпақстан хабар агентлиги.