Татарстан Республикасы Илимлер академиясында Қарақалпақстан Республикасы Министрлер Кеңеси Баслығының орынбасары Б.Өтемуратовтың басшылығындағы делегация ағзалары менен рәсмий ушырасыў болып өтти.
Илажда Татарстан Республикасы Илимлер академиясы Президенти Рифкат Миннихонов қутлықлаў сөзи менен ашып, делегация ағзаларын Илимлер академиясының тийкарғы жумыс бағдары менен таныстырып өтти. Буннан соң, Татарстан Республикасы Илимлер академиясы институтлары директорлары ҳәм бөлим баслықлары бүгинги күни әмелге асырылып атырған жумыслар, бир қатар перспективалы илимий жойбарлар менен таныстырды. Татарстан Республикасы Илимлер академиясының илимий орайлары бүгинги күнде республикамыздағы бир қатар илимий мәкемелер ҳәм жоқары оқыў орынлары менен өз-ара бирге ислесип келмекте.
Ушырасыў даўамында Өзбекстан Республикасы Илимлер академиясы Қарақалпақстан бөлиминиң баслығы, Қарақалпақ мәмлекетлик университетиниң ректоры А.Реймов ҳәм Татарстан Республикасы Илимлер академиясы Президенти Р.Миннихоновлар бирге ислесиў Меморандумын дүзди. Татарстан Республикасы Илимлер академиясы менен Өзбекстан Республикасы Илимлер академиясы Қарақалпақстан бөлими ҳәм Қарақалпақ мәмлекетлик университети арасында дүзилген Меморандумнан гөзленген баслы мақсет, илим ҳәм жаңа технологияларды раўажландырыў сондай-ақ, билимлендириў тараўында илимий жойбарларды биргеликте әмелиятқа енгизиў болып табылады.
Қарақалпақстан хабар агентлиги.