Мәмлекетимизде инвестициялық сиясатты түп-тийкарынан жетилистириў ҳәм әмелге асырыў процесине заманагөй, нәтийжели көзқарас ҳәм механизмлерди енгизиў, сондай-ақ, инвестициялық процессти жеделлестириў ҳәм улыўма исбилерменлик шараятын жақсылаў илажлары басқышпа-басқыш үзликсиз түрде әмелге асырылмақта.
Әмелге асырылып атырған илажлар экономикалық тармақларды, социаллық ҳәм өндирислик инфраструктураларды жедел раўажландырыў ҳәм модернизациялаўға хызмет етпекте.
Инвестициялық орталықтың жақсыланғанлығы, зәрүр шараятлардың жаратылғанлығы нәтийжесинде 2024-жылдыӊ январь-июнь айларының жуўмағы менен Республиканыӊ тийкарғы капиталын көбейтиўге 9 456,1 млрд. сумнан аслам инвестиция киргизилип, соннан, сырт ел инвестициялары ҳәм кредитлери 6 851,4 млрд. сумды ямаса 549,8 млн. АҚШ долларын қурады.
– Қарақалпақстан Республикасына тийкарғы капиталға киргизилген инвестициялардың 1 406,2 млрд. сумы қайта ислеў санаатына, 385,6 млрд. сумы аўыл, тоғай ҳәм балық хожалығына, 583,2 млрд. сумы тасыў ҳәм сақлаўға, 375,5 млрд. сумы қурылыс хызмети түрине, 4 311,1 млрд. сумы таў-кән санааты ҳәм ашық кәнлерде ислеўге, 107,7 млрд. сумы көтере ҳәм усақлап сатыўға, 152,9 млрд. сумы билимлендириў хызмет түрлерине жумсалған,-дейди Қарақалпақстан Республикасы статистика басқармасы Инвестиция ҳәм қурылыс статистикасы бөлиминиң баслығы Саламат Мухаматдинов.
2024-жылдыӊ январь-июнь айларында улыўма майданы 461,0 мыӊ кв.м. болған 2526 турақ жай питкерип тапсырылып, соннан 240,0 мың кв.м.лик 1305 турақ жай аўыллық жерлерге туўра келеди.
Улыўма билим бериў мектеплерин ҳәм мектепке шекемги билимлендириў объектлерин қурыў, жаӊадан реконструкциялаў жумысларына 53,2 млрд. сум әтирапында инвестициялар өзлестирилди.
Мәмлекетимизде халықтыӊ турмыс дәрежесин жақсылаў, әмелдеги өндиристи техникалық хәм технологиялық жақтан қайта үскенелеў, стратегиялық әҳмийетке ийе болған тиккелей сырт ел инвестицияларын өзлестириў ҳәм ресурслардан дурыс пайдаланыў бағдарындағы жедел инвестициялық сиясатты алып барыў илажлары нәтийжели даўам етпекте.
Ә.Жийемуратов,
Қарақалпақстан хабар агентлиги.