Бүгин ярым ақшамда футбол бойынша Европа чемпионатында дәслепки ярым финал ойыны болып өтти.
Онда быйылғы чемпионатта бирде-бир жеңилиске ушырамаған Испания сайланды командасы усы күнге шекем еки мәрте Европа чемпионлығын қолға киргизиўге миясар болған Франция сайланды командасы менен өз-ара ушырасты.
Ушырасыўдың дәслепки минутларында өзиниң үстинлигин көрсеткен французлар 8-минутта Испания дәрўазасын анық нышанға алыўға еристи. Гол авторы Рандал Коло-Муани.
21-минутқа келип Испанияның ең жас футболшысы Ламин Ямал өзиниң супер голын урып, ойындағы есапты теңлестириўге миясар болды. Арадан 4 минут өтип Дани Олмо Франция дәрўазасына гол урып, испанларды есапта алдыға алып шықты.
Екинши таймда командалар гол урыўға қанша ҳәрекет еткени менен дәрўазаларға гол урылмады ҳәм ла Фуэнте шәкиртлери финалға жол алды.
Ал, бүгин чемпионатта және бир ярым финал ойыны өткерилип, онда
Англия Нидерландия менен ушырасады. Ушырасыў мәмлекетимиз ўақты менен саат 00:00 де басланады.
Адилбай Оразов,
Қарақалпақстан хабар агентлиги шолыўшысы.