5-6-июль күнлери Германияда өткерилип атырған футбол бойынша Европа чемпионатында шерек финал ойынлары болып өтти.
Қызықлы болып өткен 4 ойынның биреўи тийкарғы ўақытта жуўмақланған болса, екеўи қосымша таймларда, ал, биреўи пенальтилер сериясында жуўмақланды.
Атап айтқанда, Англия-Швейцария, Испания-Германия сайланды командалары арасындағы ойынларда ушырасыў қосымша таймларда 2:1 есабы менен жуўмақланды.
Франция ҳәм Португалия сайланды командалары арасындағы ойынның тийкарғы ҳәм қосымша таймларда дәрўазаларға улыўма гол урылмады ҳәм пенальтилер сериясында әўмет французларға күлип бағып, олар ярым финал жолламасын қолға киргизди. Есап 5:3 Франция пайдасына.
Нидерландия – Түркия сайланды командалары арасындағы ушырасыўдың 70-минутына шекем түрклер есапта алда келгени менен, 70-76-минутларда нидерландиялылар 2 гол урып, өз командасының жеңисин тәмийинледи.
Солай етип, өткерилген шерек финал ойынларынан соң Испания-Франция, Англия-Нидерландия сайланды командалары ярым финалға жол алды. Ярым финалдың дәслепки ушырасыўы 10-июль күни саат 00:00 де Испания ҳәм Франция сайланды командалары арасында болып өтеди.
Адилбай Оразов,
Қарақалпақстан хабар агентлиги шолыўшысы.