Хожели районындағы 1-санлы балалар ҳәм жас өспиримлер спорт мектеби 10-санлы мектепте TAEKWONDO WT бойынша 2023-жылдың 1-октябрь күни дөгерек жумысын баслаған еди. Бул спорт түрине қызығып, дөгерекке қатнап атырған спортшы балалардың саны ҳәзир 50 ге шамаласты. Жақында Самарқанд қаласында болып өткен SAMARQAND OPEN ашық турниринде мектеп тәрбияланыўшыларынан 22 спортшы қатнасып, 15 оқыўшы 1-орынды, 3 оқыўшы 2-орын, 4 оқыўшы 3-орынды ийеледи.

-Биринши орынды ийелеп, алтын медаль ийесине айланғанымнан қуўанышлыман. Алдағы ўақытлары спорт пенен шынығыўларымды жетилистирип, буннан да үлкен нәтийжелерге ерисиўге ҳәрекет етемен,-дейди 10-санлы мектептиң 5-класс оқыўшысы Эленора Жангабаева.

Спортшы балаларды жарысқа таярлаған тренери Ислам Юлдашев. Спорт мектебиниң оқыўшылары жақында Сырдәрьяда болып өткен жарыста да жақсы нәтийжелер менен қайтқан еди.

Қарақалпақстан хабар агентлиги