Самарқанд мәмлекетлик ветеринария медицинасы, шарўашылық ҳәм биотехнологиялар университетиниң Нөкис филиалында студентлер ҳәм Гүлзар мәкан пуқаралар жыйыны жаслары арасында мини-футбол бойынша “Директор кубоги” жарысы өткерилди.
Филиалда билим алып атырған жаслардың спортқа болған қызығыўшылығын арттырыў, тараўдағы басламаларды қоллап-қуўатлаў, олардың арасында саламат турмыс тәризин қәлиплестириў ҳәм спорт пенен шуғылланыўлары ушын жетерли шараят жаратыў мақсетинде шөлкемлестирилген жарыста 12 команда қатнасты. Дерлик жүзден аслам студент ҳәм аймақ жаслары қамтып алынды. Қызықлы өткен жарыс жуўмағында жеңимпазлар анықланды.
Сыйлықлаў мәресиминде филиал директоры А.Есимбетов, Қарақалпақстан Республикасы Спорт министриниң орынбасары А.Қалбаев ҳәм басқалар шығып сөйлеп, мәмлекетимизде халықты, соның ишинде жасларды спортқа тартыў арқалы бос ўақытларын мазмунлы өткериў ҳәм олардың саламатлығын беккемлеўге қаратылып атырған итибарға тоқтап өтилди. Жарыс жуўмағында “Туран” командасы биринши орынды ийелеп, “Директор кубоги”ниң жеңимпазы болды. Екинши орынды “Тербенбес” командасы ийелеген болса, үшинши орынды Гүлзар мәкан пуқаралар жыйыны жаслары қолға киргизди.
Жеңимпаз, сондай-ақ сыйлы орынларды ийелеген командаларға диплом ҳәм баҳалы саўғалар тапсырылды.
Қарақалпақстан хабар агентлиги