Қарақалпақстан Республикасы Мәденият министрлиги тәрепинен шөлкемлестирилген «Йош» эстрадалық жойбары алты айдан берли халқымызда үлкен қызығыўшылық оятты. ϴз жумысын 2023-жыл 22-декабрьден баслаған жойбардыӊ кастингине 150 ден аслам жаслар қатнасып, олардыӊ ишинен 20 жас жойбарда қатнасыў имканиятын қолға киргизди.
Дәслепки турға январь айында старт берилип, жойбардыӊ екинши басқышына 17 қатнасыўшы жетип келди. Ал, үшинши турда 14 қатнасыўшы жойбарда өз дөретиўшилигин даўам еттирди. Төртинши турда 12, бесинши турда 10 қатнасыўшы өз талантларын сыннан өткерип, финалға 7 қатнасыўшы жетип келди.
Пайтахтымыздағы Қарақалпақстан көркем өнер сарайында болып өткен таңлаўдың финал басқышы көтериңки руўхта өткерилип, онда қатнасыўшылардың талантлары төрешилер тәрепинен баҳаланып барылды. Таңлаў шәртлерине мүнәсип қатнасқан жас талантлылар ишинде Азим Қалбаев жеңимпаз болып, Мәденият министрлиги тәрепинен 30 миллион сўм муғдарында ақшалай сыйлық пенен сыйлықланды. Сондай-ақ, оған “Өзбекконцерт” мәмлекетлик мәкемеси Қарақалпақстан Республикасы бөлими тәрепинен лицензия, қәўендерлер тәрепинен еки клип бийпул түсирилип бериледи.
Таңлаўда өз талантлары менен айрықша көзге түскен Зарима Махсудова “Жағымлы даўыс ийеси”, Малика Бийимбетова “Үмитли қосықшы”, Шайдахан Салиева “Сахна маликасы” номинациялары ийеси болып, олардың ҳәр бирине жойбардың арнаўлы статуэткасы ҳәм шөлкемлестириўшилер тәрепинен 3 миллион сум ақшалай сыйлық тапсырылды.
Жандарбек Турсынбеков, Оразбийке Жиенбаева, Алмат Халықназаровлар жойбарда белсене қатнасқанлығы ушын Диплом ҳәм 1 миллион сум ақшалай сыйлық пенен сыйлықланды.
-Кызғын беллесиўлер менен өткен таңлаў менде үлкен тәсирлер қалдырды. Ҳәр басқышта жаңа қосықлар, жаңа жойбарлар, жаңа дизайн, жаңа костюмлар, жаңа бағдарда қатнасыўымыз ушын ҳәр биримизден күшли талант, излениў талап етти. Биринши орынға мүнәсип көргенлери ушын төрешилерге миннетдаршылығым шексиз. Олардың, устазларымның, мени қоллап-қуўатлаған ықласбентлеримниң исенимин ақлап, дөретиўшилигимди мүнәсип даўам еттириўге, жаңа қосықлар атқарып халқымызға хызмет етиўге ҳәрекет етемен,-дейди таңлаў жеңимпазы А.Қалбаев.
Г.Турдышова,
Қарақалпақстан хабар агентлиги