Республикамыздың барлық аймақларында болғаны сыяқлы Қараөзек районында да «Бес баслама олимпиадасы» шеңберинде ерлер ҳәм қызлар командалары арасында спорттың футбол ҳәм киши футбол бойынша «Мәмлекетлик қәўипсизлик хызмети кубоги» ушын жарыс өткерилип, онда жеңимпазлар анықланған еди.
30-май күни усы өткерилген жарыс жеңимпазларын салтанатлы жағдайда сыйлықлаў мәресими болып өтти.
Онда район ҳәкими У. Утамбетов, Мәмлекетлик қәўипсизлик хызмети районлық бөлими жуўапкер хызметкери З. Ешчановлар шығып сөйлеп, Президентимиздиң басламасы менен бул илажлар аймақлардағы жаслардың саламатлығын беккемлеў ҳәм оларды ғалаба спортқа қамтыў мақсетинде өткерилип атырғанлығын атап өтти ҳәм жарыс жеңимпазларын қолға киргизген табыслары менен қутлықлады.
Илажда жеңимпаз командалар район ҳәкимлиги, Мәмлекетлик қәўипсизлик хызмети тәрепинен таярланған кубок, медаль ҳәм баҳалы саўғалар менен сыйлықланды.
Сондай-ақ, мәресимде бир қатар номинациялар бойынша да күшли футболшылар арнаўлы сыйлықлар менен сыйлықланды.
Салтанатлы илаж республикамызға белгили көркем өнер хызметкерлери тәрепинен таярланған концерт бағдарламасы менен даўам етти.
Адилбай Оразов,
Қарақалпақстан хабар агентлиги шолыўшысы