“Театр тамашалары ҳәптелиги” шеӊберинде республикамыздағы театрларда “Ашық есиклер күни” өткерилмекте.

Қарақалпақстан Республикасы Мәденият министрлигиниӊ мәлим еткениндей, 21–27 март күнлери “Театр тамашалары ҳәптелиги” өткерилип,  мәмлекетимиздиӊ барлық театрларында дөретиўшилик ушырасыўлар, шеберлик сабақлары,  спектакль ҳәм театрластырылған концерт бағдарламалары көрсетилмекте.

Атап айтқанда, Бердақ атындағы Қарақалпақ мәмлекетлик академиялық музыкалы театрында Ш. Айтматовтыӊ “Жәмила”, Уйғынныӊ “Әбиў Райхан Беруний”, А.Қадирийдиӊ “Анвар ва Рано” драмалары, К.Рахмановтыӊ “Ынжықтыӊ муҳаббаты” спектакли, симфониялық оркестрдиӊ “Сиз сүйген намалар”, театр хор жәмәәтиниӊ “Бәҳәр ырғақлары” концерт бағдарламалары ықласбентлердиӊ нәзерине усынылмақта. Сондай-ақ, Қарақалпақ мәмлекетлик жас тамашагөйлер театрында А.Пушкинниӊ “Цыганлар” поэмасы тийкарында саҳналастырылған “Алеко”, М.Аўезовтың “Қаракөз”, Ш.Перроныӊ “Етик кийген пышық”, К.Гольдонидиӊ “Еки байға бир малай”, Қ.Иманалиевтиӊ “Қорқыт ата”, П.Айтмуратовтыӊ “Уллы жипек жолы”, Т.Миннуллинниӊ “Бир қызға төрт ашық”, Д.Дарушованыӊ “Еркебайдыӊ қылўалары”  спектакльлери, театр художниклери Т.Шардеметов ҳәм  С.Даўлетовлардыӊ дөретиўшилик жумыслары көрсетилмекте.

Қарақалпақ мәмлекетлик Қуўыршақ театры да усы күнлери кишкене тамашагөйлер менен толы. Оларға театр жәмәәти тәрепинен “Хош келдиӊ бәҳәрим, хош келдиӊ Наўрыз” театрластырылған байрам тамашалары, М.Бегимовтыӊ “Қусларды күткен балалар”, “Шапан әпсанасы” ҳәм басқада спектакльлер көрсетилип, жас сүўретшилердиӊ арасында “Мениӊ қаҳарманларым” таӊлаўы өткерилди.

Театрларда ҳәптелик даўамындағы барлық спектакльлер менен концерт бағдарламалары, мәдений илажлар бийпул көрсетилмекте.

Қарақалпақстан хабар агентлиги