Кейинги жыллары Өзбекстан – АҚШ саўда-экономикалық қатнасықлары көлеми барған сайын кеңейип бармақта.
Өзбекстандағы «BMB Holding» холдинг компаниясы Бақлаў кеңесиниң баслығы Бекзод Маматқулов АҚШтың Айрықша ҳәм толық ҳуқықлы елшиси мырза Жонатан Хеник пенен ушырасты. Онда америкалы дипломатлар «BMB Holding»тиң кең көлемли жумысы, Өзбекстан экономикасының әҳмийетли тармақларында әмелге асырып атырған экспортқа қаратылған ири инвестициялық жойбарларының презентациясы менен танысты.
Атап айтқанда, «BMB Holding» АҚШтың «McCormick Global Ingredients Ltd» компаниясы менен өзбек шафранын АҚШ базарына экспорт етиў бойынша тығыз бирге ислесип киятырғаны атап өтилди. АҚШтың ең ири гипермаркетлер тармақларынан бири болған «COSTCO» компаниясы басқарыў кеңеси ўәкилиниң «BMB Holding» кәрханаларына сапары ҳәм өзбек шафраны, шафраннан таярланған қосымша қунға ийе өнимлерди Америка базарларына, атап айтқанда, «COSTCO» гипермаркетлер тармағына жеткерип бериў бағдарында келисимге ерисилди.
Өз-ара бирге ислесиў байланысларының даўамы сыпатында усы жылдың екинши шерегинде «BMB Holding» делегациясының АҚШқа жумысшы сапарының шөлкемлестирилиўине де келисип алынды.
Агрологистика комплексиниң жумысы, оның қуўатлылығы, экспорт потенциалы ҳәм географиясы, хызмет түрлери, сондай-ақ, жаратылған басқа да имканиятлар менен шараятлар ҳаққында сөз болғанда, бул заманагөй агрологистика комплексин шөлкемлестириў жойбарының улыўма баҳасы 57 миллион 700 мың АҚШ долларын қурап, комплекс үш модульден ибарат болып есапланады. Олардың ҳәр биринде жылына 270 мың тоннаға шекем аўыл хожалығы өнимлерин жетистириў қуўатлылығы бар. Жойбарды әмелге асырыў ушын Жиззақ ўәлаятының Шараф Рашидов районынан 40 гектар жер майданы ажыратылған. Барлық режелестирилген модульлердиң улыўма айланыс қуўатлылығы жылына 810 мың тоннаны қурайды.
Сондай-ақ, сырт елли исбилерменлер әне, усы районда қурылып атырған және бир ири инвестициялық жойбар – «BMB Agro Plus» кәрханасының жумысы менен де танысты. «BMB Holding» қарамағындағы мийўе-овощ ҳәм азық-аўқат кластерлеринде аўыл хожалығы өнимлерин жетистириўден терең қайта ислеўге шекемги толық шынжырды шөлкемлестириў, сондай-ақ, жоқары қосымша қунлы өнимлер ислеп шығарыў ҳәм Европа мәмлекетлерине экспорт етиў мақсетинде «BMB Agro Plus» кәрханасының биринши басқышы май айында иске қосылыўы режелестирилген.
А.Қаюмов, Ж.Ёрбеков (сүўрет),
ӨзАның хабаршылары