Ózbekstan Respublikası Prezidenti Shavkat Mirziyoev 13-mart kúni Parij qalasındaǵı Burbon sarayında Franciya Milliy májlisi Baslıǵı Yael Braun-Pive menen ushırasıw ótkerdi.

Eki mámleket arasındaǵı parlamentleraralıq almasıwdı jáne de keńeytiw máseleleri kórip shıǵıldı.
Bul sapardıń tariyxıy áhmiyeti, Ózbekstan hám Franciya arasında strategiyalıq sheriklik qatnasıqlarınıń ornatılǵanı úlken qanaatlanıwshılıq penen atap ótildi.
Franciya parlamenti tómengi palatasınıń basshısı Jańa Ózbekstanda ámelge asırılıp atırǵan demokratiyalıq ózgerislerdi, wákillikli uyımlardıń roli, hayal-qızlar, balalar, jaslar hám mayıplıǵı bolǵan shaxslardıń huqıqları hám ekologiyalıq qáwipsizlik kepillikleriniń kúsheygenin joqarı bahaladı.
Ózbekstan – Franciya parlamentleraralıq forumın shólkemlestiriw hám «jol kartası» tiykarında doslıq toparlarınıń jumısın qayta tiklew máseleleri dodalandı.
Ózbekstan jetekshisi Milliy májilis Baslıǵın bıyıl aprel ayında Tashkent qalasında bolıp ótetuǵın Parlamentleraralıq awqamnıń 150-yubiley assambleyasında qatnasıw ushın mámleketimizge mirát etti.
Ushırasıw sońında Ózbekstan Respublikası Prezidenti Húrmetli miymanlar kitabında qol jazbasın jazıp qaldırdı.

ÓzA