Qanlıkól rayonındaǵı Mádeniyat orayında sociallıq qorǵaw reestrine kirgizilgen shańaraqlarǵa mámleket tárepinen berilip atırǵan jeńillikler hám járdemler boyınsha túsindiriw jumısların alıp barıw maqsetinde seminar shólkemlestirildi.
Maqset – rayondaǵı isbilermenlik ortalıǵın jáne de jaqsılaw, xalıqtıń óz biznesin jolǵa qoyıwına járdemlesiw hám aymaqtıń ekonomikalıq potencialın bekkemlew.
Ilajǵa Qanlıkól rayonı hákiminiń birinshi orınbasarı F.Xalmuratov, Qaraqalpaqstan Respublikası Kámbaǵallıqtı qısqartıw hám bántlik ministriniń birinshi orınbasarı A.Kayratdinov, Sociallıq qorǵaw milliy agentligi Qaraqalpaqstan Respublikası basqarmasınıń bólim baslıǵı A.Sulaymanov, Oraylıq banktiń Qaraqalpaqstan Respublikası Bas basqarmasınıń bank xızmetkeri J.Turǵanbaev, Jaslar isleri basqarması bas qánigesi S.Azerbaevlar qatnastı.
Seminar dawamında sociallıq napaqa, subsidiya, jeńilletilgen kredit, bántlik baǵdarlamaları hám isbilermenlikti qollap-quwatlaw mexanizmleri haqqında tolıq maǵlıwmatlar berildi.
Ótkerilgen seminar dawamında Prezidentimizdiń baslaması menen shańaraqlıq hám kishi biznesti rawajlandırıw maqsetinde ajıratılıp atırǵan 12 procentlik jeńilletilgen kredit tuwralı da maǵlıwmatlar berilip, túsindirildi. Atap aytqanda, qánigeler tárepinen kredit alıw huqıqına iye bolǵan puqaralardıń kategoriyası, qarjı ajıratıw tártibi hám shártleri, sonday-aq, tiykarǵı baǵdarlar boyınsha tolıq túsinikler berildi.
Atap ótilgenindey, qarar tiykarında tańlap alınǵan máhállelerde perspektivalı joybarlardı ámelge asırıw, jańa jumıs orınların jaratıw hám shańaraqlardıń dáramatın arttırıw tiykarǵı maqset etip belgilengen. Respublikadan biriktirilgen wákiller, bank xızmetkerleri hám rayondaǵı juwapkerler tárepinen ámeliy usınıslar berildi.

Qaraqalpaqstan xabar agentligi