Usı jıldıń 1-mart sánesinen baslap Gabriela Popesku “Microsoft” kompaniyasınıń Rumıniya, Moldova hám Oraylıq Aziya boyınsha regionallıq basshısı lawazımına kiristi. Ol huqıq, biznes hám texnologiyalar boyınsha tájiriybesi, sonday-aq, korporativ muwapıqlıq tarawındaǵı bilimleri menen tanılǵan qánige bolıp esaplanadı.
Popesku 2017-jıldan berli Rumıniyada jumıs alıp barǵan hám sońǵı waqıtları Oraylıq Evropa boyınsha korporativ, sırtqı hám huqıqıy máseleler basshısı jáne kompaniyanıń waqıtsha bas menedjeri wazıypaların atqarǵan.
Atap ótiliwinshe, jańa lawazımında ol Oraylıq Aziya mámleketlerinde sanlı transformaciyanı jáne de rawajlandırıw hám jasalma intellekt texnologiyaların juwapkershilikli engiziwge itibar qaratadı.
– Sanlı transformaciya tek ǵana texnologiya emes, al isenim, bilim hám uzaq múddetli birge islesiwge súyenedi, – deydi Popesku. – Sonıń ushın “Microsoft” regionda mámleketlik xızmetler, bilimlendiriw, densawlıqtı saqlaw hám milliy turaqlılıq tarawlarında sanlı sheshimlerdi engiziwdi keńeytiwdi rejelestirmekte.
Kompaniya sonday-aq, jasalma intellektti qáwipsiz hám juwapkershilikli qollanıw, maǵlıwmatlardı qorǵaw hám kiberqáwipsizlikti támiyinlew, jergilikli innovaciyalıq ortalıqtı rawajlandırıw hám sanlı kónlikpelerdi arttırıw sıyaqlı baǵdarlarda Oraylıq Aziya mámleketleri menen birge islesiwdi kúsheytiw niyetinde.

Musulmon Ziyo, ÓzA