Farmacevtika tarmaǵın rawajlandırıw agentliginiń direktorı Abdulla Azizov hám Korea Overseas Infrastructure & Urban Development Corporation (KIND) tárepinen “2025 K-City Network: Tashkent Smart Bio-Cluster” joybarı sheńberinde gezektegi birge islesiw ushırasıwı shólkemlestirildi.
Ushırasıwda “Tashkent Pharma Park” farmacevtika klasteri aymaǵında ámelge asırılıwı rejelestirilgen SMART-BIO CLUSTER joybarına ayrıqsha itibar qaratıldı. Bul iri baslama biosanaat zonası, ilimiy-izertlew orayı, jasalma intellekt hám startaplar aymaǵı, sonday-aq, sociallıq hám injenerlik-infrastruktura obektlerin óz ishine aladı.
Sóylesiwler dawamında tiykarǵı baǵdarlar boyınsha birge islesiw máseleleri hár tárepleme dodalandı. Atap aytqanda, SMART-BIO CLUSTER joybarın ámelge asırıwǵa sırt el investiciyaların tartıw, zamanagóy biotexnologiyalıq hám farmacevtika óndiris quwatlıqların jaratıw, ilimiy-izertlew hám innovaciyalardı rawajlandırıw, mámleketlik-jeke menshik sheriklik tiykarında birgeliktegi joybarlardı qáliplestiriw, tarawda aldınǵı sırt el tájiriybesin engiziw, joqarı maman kadrlardı tayarlaw hám olardıń mamanlıǵın arttırıw, farmacevtika klasterleriniń nátiyjeliligin arttırıw boyınsha pikir-usınıslar bildirildi.
Sonday-aq, joybardıń ekonomikalıq áhmiyeti, sonıń ishinde, jalpı ishki ónimge qosatuǵın úlesi, óndiris kólemin arttırıw hám 8 mıńnan aslam jańa jumıs orınların jaratıw imkaniyatı ayrıqsha atap ótildi. Ushırasıw juwmaǵında tárepler joybardı keyingi basqıshqa alıp shıǵıw, atap aytqanda, texnikalıq-ekonomikalıq tiykardı islep shıǵıw hám onı joqarı dárejede usınıw máseleleri boyınsha kelisimge eristi.
Atap ótilgenindey, bul birge islesiw Ózbekstan hám Koreya arasındaǵı strategiyalıq sheriklik qatnasıqların jáne de bekkemlew, farmacevtika hám biotexnologiya tarawlarına iri investiciyalardı tartıw jáne joqarı qosımsha qunǵa iye innovaciyalıq óndirislerdi rawajlandırıwǵa xızmet etedi.

Mohigul QOSIMOVA, ÓzAnıń xabarshısı