Anemiya – bul qanda gemoglabin yaki eritrocitlerdiń jetispewshiligi bolıp esaplanadı. Házirgi kúndegi ekologiyalıq mashqalalar, shor suw, hámiledarlıq dáwiri, nadurıs awqatlanıw, háreketleniwdiń azlıǵı, organizmdegi parazitler sebepli payda bolıp atırǵan kemqanlıq kópshilikti qıynap kelmekte. Bunıń sebebinen organizmge kislorod jeterli dárejede barmaydı nátiyjede tez sharshaw, hálsizlik, bas aylanıwı, júrektiń tez urıwı, dem qısıwı sıyaqlı belgiler payda boladı.

Al, bul kesellikti úy jaǵdayında qalay emlesek boladı?

Dáslep temirge bay awqatlardı kúnlik racionǵa qosıw lazım.

Eń temirge bay hám bársheniń úyinen tabılatuǵın mal yamasa qoy bawırı (háptesine 2-3 márte), mal, qoy hám tawıq góshi, balıq ónimlerin turaqlı paydalanıw maqsetke muwapıq.

Ósimliklerden gorox, lobiya, másh, shpinat, grechkalı awqatlar nátiyjeli bolıp tabıladı.

Keptirilgen miywelerden kishmish, erik, ǵoza, arab qurması, ánjirdi racionnan ayırmaw kerek.

Eger 200 gramm kishmish, 200 gramm qaq erik yamasa ǵoza, 100 gramm arab qurması, pal (qálewińiz boyınsha) hám 1-2 tamshı limon suwın aralastırıp, kúnine 2-3 as qasıq shay yamasa nan menen jeseńiz 2-3 háptede gemoglabin sezilerli dárejede kóteriledi. Bul aralaspanı balalarǵa da biymálel berseńiz boladı.

Láblebi hám geshir eń arzan hám nátiyjeli ónim. Bulardı salat yamasa sok túrinde qabıllaw jaqsı nátiyje beredi.

Bunnan basqa da anar hám alma temirge eń bay ónimlerden esaplanadı.

Joqarıdaǵı ónimlerdi S vitamini menen yaǵnıy limon, anar, bolgar burıshı menen birgelikte qollansańız jáne de jaqsı nátiyjege erisesiz.

Qaysı ónimlerden paydalanıwdı azaytıw kerek?

Shay hám kofe, sonday-aq, shokolad hám kakao – bular anemiyada densawlıǵımızdıń eń úlken dushpanı. Sebebi quramındaǵı tannin temirdi baylap taslaydı. Ásirese, qara shay awqat penen birge ishilse temirdiń sorılıwın keskin azaytadı. Sol sebepli bulardı awqatlanbastan 1-2 saat aldın yamasa keyin ishiw másláhát beriledi. Kishkene balalarǵa shay hám kofe ulıwma múmkin emes.

Sút ónimleri (sút, qatıq, smetana, muzqaymaq) kalciyge bay bolǵanı menen temirdi bloklaydı sol sebepli temirge bay awqatlar menen qollanılmaǵanı yamasa 1-2 saat aldın bolmasa keyin ishilgeni durıs.

Joqarıdaǵı másláhátlerge ámel etseńiz, úy jaǵdayında dárilersiz de gemoglabin tez kóteriledi. Eger gemoglabin muǵdarı júdá pás hám belgiler kúshli bolsa shıpakerge múráját etiń!

Internet materialları tiykarında tayarlaǵan Bibisanem Joldasbaeva,

Berdaq atındaǵı QMU dıń 2-kurs magistrantı.

Qaraqalpaqstan xabar agentligi