Elimizde mámleketlik medicinalıq qamsızlandırıw sistemasın basqıshpa-basqısh engiziw sheńberinde Mámleketlik medicinalıq qamsızlandırıw qorı Reimbursaciya baǵdarlamasın ámelge asırmaqta. Baǵdarlama 2022-jılı baslanǵan bolıp, aymaqlarda basqıshpa-basqısh keńeytilmekte.
Maǵlıwmat ushın aytıw kerek, Reimbursaciya baǵdarlaması arqalı sozılmalı keselliklerge shalınǵan nawqaslarǵa shańaraqlıq shıpaker tárepinen jazılǵan elektron recept tiykarında dári-dármaqlar biypul beriledi.
Házirgi waqıtta baǵdarlamaǵa arteriallıq gipertoniya, júrek ishemiyalıq, qantlı diabettiń 2-túri, qantsız diabet, bronxial astma, ókpeniń sozılmalı obstruktiv hám asqazan-ishek sisteması kesellikleri sıyaqlı 12 kesellik toparı kirgizilgen. Bul kesellikler ushın 28 túrdegi dári quralları ambulator emleniwde biypul usınıs etiledi.
Paytaxtımızda ótkerilgen “Reimbursaciya baǵdarlaması: mámleketlik medicinalıq qamsızlandırıw arqalı xalıqqa berilip atırǵan dári-dármaqlar” atamasındaǵı baspasóz konferenciyasında áne usılar haqqında sóz etildi.
Onda Ózbekstan Respublikası Densawlıqtı saqlaw ministrligi, Mámleketlik medicinalıq qamsızlandırıw qorı, Farmacevtika ónimleri qáwipsizligi orayı, “Dári-dármaq” akcionerlik kompaniyasınıń juwapkerleri hám ǵalaba xabar qurallarınıń wákilleri qatnastı.
Ilajda atap ótilgenindey, Prezidentimizdiń tiyisli qararına muwapıq, házirgi waqıtqa shekem Tashkent qalası, Qaraqalpaqstan Respublikası, Sırdárya, Samarqand, Nawayı, Xorezm, Buxara hám Qashqadárya wálayatlarında Reimbursaciya baǵdarlaması tolıq engizildi.
Onıń sheńberinde sozılmalı keselliklerge shatılǵan nawqaslarǵa shańaraqlıq shıpaker jazǵan elektron recept tiykarında 28 túrdegi dári-dármaqlar ambulator emleniw ushın biypul berilmekte. Dári qárejetleri Mámleketlik medicinalıq qamsızlandırıw qorı tárepinen qaplap berilmekte.
2025-jıldıń aqırına bola, Reimbursaciya baǵdarlaması sheńberinde 1 million 314 mıń nawqas dári-dármaqlar menen támiyinlendi. Usı jılı bul mexanizm mámleketimizdiń qalǵan aymaqlarında da tolıq jolǵa qoyılatuǵını belgilengen.
Ánjumanda juwapkerler Tashkent qalası hám 15 tájiriybe-sınaq aymaǵında ámeliyatqa engizilgen “Elektron recept” sisteması menen Reimbursaciya baǵdarlaması tiykarındaǵı elektron receptti aljastırmaw kerek ekenligin atap ótti.
Reimbursaciya baǵdarlamasında elektron recept tiykarında dispanser qadaǵalawında turıwshı nawqaslarǵa dári-dármaqlar biypul beriledi. “Elektron recept” sistemasında bolsa nawqas dárini satıp aladı.
Atap ótilgenindey, Reimbursaciya baǵdarlaması xalıqtı sapalı hám kepillengen dári-dármaqlar menen támiyinlew, sozılmalı kesellikler aqıbetlerin azaytıw hám medicinalıq xızmetlerdiń ashıq-aydınlıǵın arttırıwǵa xızmet etedi.
Ilajda jurnalistler ózlerin qızıqtırǵan sorawlarǵa qánigelerden tolıq juwap aldı.

Mohigul QOSIMOVA,
ÓzAnıń xabarshısı