Jizzaq wálayatında qılıshlasıw sportınıń sablya túri boyınsha 13 jasqa shekemgi jas óspirimler arasında Ózbekstan chempionatı bolıp ótti.
CHempionatqa mámleketimizdiń barlıq aymaqlarınan jas sportshılar qatnasıp, jeńimpazlıq ushın óz-ara bellesti. Keskin bellesiwlerge tolı bolǵan jarıs sońında ul balalar arasında qaraqalpaqstanlı Ilham Tilewmuratov altın, Qayıpbergen Qádirbaev qola, qızlar arasında Muhabbat Qayratdinova altın, Tumaris Jiyenbaeva gúmis hám Ella Seytmuratovalar qola medalların qolǵa kirgiziwge miyasar boldı.
Sonday-aq, respublikamızdıń jas sportshıları komandalıq bellesiwlerde de ózleriniń asa sheberliklerin kórsetip, ul balalar arasında altın hám 2 qola, qızlar arasında altın hám qola medalların jeńip aldı.
Álbette, jas qılıshpazlarımızdıń qolǵa kirgizgen bul tabısları olardıń tınımsız islegen miynetleri, bekkem jigeri hám jeńiske degen iseniminiń jemisi bolıp tabıladı.
Barlıq jeńimpazlar, trenerler hám ata-analardı bul úlken jeńisi menen qızǵın qutlıqlaymız!

Adilbay Orazov,
Qaraqalpaqstan xabar agentligi sholıwshısı.