Qaraqalpaqstan Respublikası sudları baslıqları tárepinen Beruniy rayonında gezektegi kóshpeli qabıllaw shólkemlestirildi. Onda Beruniy, Ellikqala hám Tórtkúl rayonlarınan kelgen puqaralardıń sud-huqıq tarawına baylanıslı múrájatları qabıl etilip, hár tárepleme kórip shıǵıldı.
Kóshpeli qabıllawdıń tiykarǵı maqseti xalıqtı qıynap atırǵan máselelerdi ornında úyreniw, puqaralardıń sud qorǵawına bolǵan huqıqın támiyinlew jáne olarǵa nızamlı hám huqıqıy túsinikler beriwden ibarat boldı.
Qabıllaw dawamında puqaralar tárepinen, tiykarınan, jınayat isleri boyınsha sudlar tárepinen tayınlanǵan jazanı jeńiliregi menen almastırıw, jumısqa tiklew, turaq jay hám jer uchastkalarına baylanıslı kadastr máseleleri, aliment óndiriw, sonday-aq, orınlaw hújjetleri menen baylanıslı máseleler boyınsha múrájatlar bildirildi. Sud basshıları hár bir múrájattı dıqqat penen tıńlap, ámeldegi nızamshılıq normaları tiykarında tiyisli huqıqıy túsinikler berdi. Sonıń menen birge, múrájat etiwshilerge sud qararları menen baylanıslı máseleler tek ǵana nızamshılıqta belgilengen tártipte, tiyisli sud instanciyalarında kórip shıǵılıwı, bunday processler belgili bir múddet hám waqıt talap etiliwi hár tárepleme túsindirip berildi. Kóshpeli qabıllawda puqaralardıń múrájatlarına sheshim tabıw, olardıń huqıqları menen nızamlı máplerin qorǵaw, sonday-aq, sud-huqıq sisteması jumısında ashıq-aydınlıqtı támiyinlewge ayrıqsha itibar qaratıldı.
Bunday kóshpeli qabıllawlar xalıq penen tikkeley qarım-qatnastı kúsheytiw, sud sistemasına bolǵan isenimdi arttırıw hám puqaralardıń huqıqıy sanası menen mádeniyatın arttırıwda úlken áhmiyetke iye. Qaraqalpaqstan Respublikası sudları tárepinen bunday ilajlar turaqlı túrde izbe-iz dawam ettirilip kelinbekte.

Qaraqalpaqstan xabar agentligi