Qazaqstanda mámleketlik basqarıw sistemasında jańa lawazım – vice-prezident institutın engiziw rejelestirilmekte. Vice-prezidentti mámleket basshısı parlamenttiń razılıǵı menen, kópshilik dawıs tiykarında tayınlaydı. Onıń wákillikleri sheńberin bolsa tikkeley prezident belgileydi.
Usınıs etilip atırǵan tártipke bola, vice-prezident mámleket prezidentiniń tapsırmasına tiykarlanıp tómendegi wazıypalardı atqaradı:
• Qazaqstan Respublikasınıń máplerin xalıqaralıq forumlar hám sırt mámleketlerdiń delegaciyaları menen sóylesiwlerde bildiriw;
• Prezident atınan parlamentte qatnasıw;
• Jergilikli hám sırt el jámiyetlik-siyasiy, ilimiy hám mádeniy-aǵartıwshılıq shólkemler menen birge islesiwdi jolǵa qoyıw.
Vice-prezident institutın engiziw normasın Konstituciyada bekkemlew usınıs etilmekte. Sonıń menen birge, parlament jumısın támiyinlep kelgen ayırım strukturalardı saplastırıw, sonday-aq, mámleketlik keńesgóy lawazımın biykar etiw rejelestirilgen.
Maǵlıwmat ushın, prezident Qasım-Jomart Toqaev Konstituciyaǵa ózgeris kirgiziw boyınsha referendum ótkeriw haqqında toqtap, bul ilaj sánesi arnawlı komissiya óz jumısın juwmaqlaǵannan soń járiyalanatuǵının málim etti.
“Biz, tiykarında, jańa Konstituciyanı qabıl etiwge qádem taslamaqtamız. Sonıń ushın men Konstituciyalıq komissiya dúziwge qarar ettim. Erteń tiyisli pármanǵa qol qoyaman”, – dedi mámleket basshısı.

Qaraqalpaqstan xabar agentligi