Usı jıldıń 29-dekabr kúni Qaraqalpaqstan Respublikası Joqarǵı Keńesiniń toǵızınshı sessiyası bolıp ótti.

Sessiyaǵa Ózbekstan Respublikası Oliy Majlis Senatı aǵzaları, deputatlar, ministrlikler hám taraw basshıları, ǵalaba xabar qurallarınıń wákilleri qatnastı.

Dáslep Ózbekstan Respublikası hám Qaraqalpaqstan Resublikasınıń mámleketlik gimnleri jańladı.
Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev basqarıp bardı.
Sessiyada dáslep, Joqarǵı Keńes Baslıǵı sońǵı jıllarda Prezidentimizdiń Qaraqalpaqstanǵa bolǵan ayrıqsha itibarı menen ámelge asırılǵan keń kólemli dóretiwshilik jumıslarǵa keń túrde toqtaldı.
Atap ótilgenindey, juwmaqlanıp atırǵan 2025-jılda barlıq tarawlarda jańalanıwlar hám ózgerisler júz berip, qala hám rayonlarımızda, hátteki eń shetki aymaqlarda da keń kólemli dóretiwshilik jumıslar ámelge asırılmaqta. Álbette, onda Prezidentimiz tárepinen tek ǵana Qaraqalpaqstan ushın qabıl etilgen 25 ten aslam párman hám qararları áhmiyetli orın tutadı.
Sessiyada usınday jaratıp berilgen imkaniyatlar tiykarında jańadan iske túsken kárxanalar, ámelge asırılǵan joybarlar haqqında maǵlıwmatlar berildi.
Sonday-aq, Joqarǵı Keńes Baslıǵı usınday keń imkaniyatlardıń jaratılıp beriliwi arqalı kelesi 2026-jılda ámelge asırılıwı tiyis baslı maqsetlerge erisiw boyınsha anıq rejeler belgilep alınǵanlıǵın atap ótti.
Sessiyanıń kún tártibindegi dáslepki másele, Qaraqalpaqstan Respublikasınıń 2026-jılǵı jergilikli byudjetin tastıyıqlaw haqqında bolıp, bul másele boyınsha Ekonomika hám finans ministriniń orınbasarı M.Bekchanov bayanat jasadı.
Atap ótilgenindey, Prezidentimiz tárepinen belgilep berilgen wazıypalar hám turmısqa engizilip atırǵan reformalar nátiyjesinde 2025-jıldıń juwmaǵı menen, jalpı aymaqlıq ónimniń kólemi ótken jıldıń usı dáwirine salıstırǵanda 105,9 procentke ósiwi kútilmekte. Usı jılı Qaraqalpaqstan Respublikasınıń jergilikli byudjet dáramatları 100,1 procentke orınlanıwı kútilmekte.
Sessiyada makroekonomikalıq kórsetkishler prognozı, salıq hám byudjet siyasatınıń tiykarǵı baǵdarları haqqında maǵlıwmatlar berildi.
2026-jılı jalpı aymaqlıq ónim kóleminiń ósiw pátin ótken dáwirge salıstırǵanda 6,2 procentke, 2030-jılǵa kelip 6,0 procentke jetkeriw rejelestirilmekte.
Sessiyada Ózbekstan Respublikası Esap palatasınıń inspektorı B.Mirzoev bayanat jasadı. Kún tártibindegi usı másele tolıq kórip shıǵıldı hám deputatlar tárepinen tiyisli qarar qabıl etildi.
Sessiyanıń kún tártibindegi keyingi másele «Básekilik haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komitetiniń baslıǵı B.Seytnazarov bayanat jasadı. Bul másele de qarap shıǵılıp, tiyisli qarar qabıl etildi.
Kún tártibindegi keyingi másele «Telekommunikaciyalar haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Sociallıq-mádeniy rawajlanıw, jaslar siyasatı hám jámiyetlik birlespeler máseleleri komitetiniń baslıǵı M.Atamuratov bayanat jasadı. Bul másele boyınsha deputatlar tárepinen qarar qabıl etildi.
Sessiya kún tártibinde «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, Joqarǵı Keńestiń Sud-huqıq máseleleri hám korrupciyaǵa qarsı gúresiw komitetiniń baslıǵı A.Atajanov bayanat jasadı. Bul másele de tolıq kórip shıǵıldı hám deputatlar tárepinen qarar qabıl etildi.
Sessiyada «Kámbaǵallıqtan abadanlıqqa qaray» baǵdarlaması tiykarında belgilep berilgen wazıypalardıń orınlanıwı boyınsha Qaraqalpaqstan Respublikası Kámbaǵallıqtı qısqartıw hám bántlik ministrligine jiberilgen Parlamentlik sorawınıń nátiyjesi tuwralı másele qarap shıǵıldı. Bul másele boyınsha Kámbaǵallıqtı qısqartıw hám bántlik ministri Q.Azerbaev bayanat jasap, tolıq kórip shıǵılıp, deputatlar tárepinen tiyisli qarar qabıl etildi.
Sessiyada Qaraqalpaqstan Respublikası aymaǵındaǵı ulıwma paydalanıwdaǵı avtomobil hám ishki jollardı hám de kópirlerdi ońlaw baǵdarında alıp barılıp atırǵan ilajlardıń barısı boyınsha Avtomobil jolları bas basqarmasına parlamentlik soraw jiberiw tuwralı másele boyınsha Joqarǵı Keńestiń Sanaat, qurılıs, transport hám málimleme texnologiyaları máseleleri komitetiniń baslıǵı I.Sdikov bayanat jasadı. Bul másele de tolıq qarap shıǵılıp, tiyisli qarar qabıl etildi.
Kún tártibindegi keyingi másele kommerciyalıq banklerde baǵdarlamalar sheńberinde kredit qarjılarınıń ajıratılıwında hám fizikalıq hám de yuridikalıq shaxslardıń múrájatların, sonday-aq xızmetkerlerdiń arasında korrupciyanıń aldın alıwǵa qaratılǵan jumıslar boyınsha Oraylıq banktiń Qaraqalpaqstan Respublikası Bas basqarmasına parlamentlik soraw jiberiw tuwralı másele boldı. Bul másele boyınsha Joqarǵı Keńestiń komitet baslıǵı B.Seytnazarov bayanat jasadı hám deputatlar tárepinen qarar qabıl etildi.
Sessiya kún tártibinde ózbasımshalıq penen iyelep alınǵan jer uchastkasına bolǵan ijara huqıqı hám olarda qurılǵan imaratlar menen obektlerge bolǵan múlk huqıqı tán alınıp atırǵan puqaralardıń dizimin sessiya qararı menen tastıyıqlaw máselesi de qarap shıǵıldı. Ózbekstan Respublikasınıń arnawlı Nızamın basshılıqqa alıp, ózbasımshalıq penen iyelep alınǵan jer uchastkasına bolǵan ijara huqıqı jáne olarda qurılǵan imaratlar menen obektlerge bolǵan múlk huqıqı tán alınıp atırǵan 385 puqaranıń dizimi sessiya qararı menen tastıyıqlandı.
Sessiya kún tártibinde Qaraqalpaqstan Respublikası Konstituciyalıq baqlaw komitetiniń baslıǵın saylaw haqqındaǵı másele de kórip shıǵılıp, Paraxat Aytniyazov Qaraqalpaqstan Respublikası Konstituciyalıq baqlaw komitetiniń baslıǵı lawazımına qayta saylandı.
Sessiya májilisiniń kún tártibindegi keyingi másele Joqarǵı Keńes Prezidiumınıń tiyisli qararların tastıyıqlaw haqqında bolıp, bul másele boyınsha da deputatlar tárepinen tiyisli qarar qabıl etildi.
Usınıń menen Qaraqalpaqstan Respublikası Joqarǵı Keńesiniń toǵızınshı sessiyası óz jumısın juwmaqladı.

Qaraqalpaqstan xabar agentligi