Kitap oqıw, basıp shıǵarıw hám keleshek áwladtı kitapqumarlıqqa degen qızıǵıwshılıǵın arttırıw boyınsha alıp barılıp atırǵan jumıslar mámleketlik siyasat dárejesine kóterilip, bul baǵdardaǵı iygilikli isler bilimlendiriw tarawında ayrıqsha kózge taslanbaqta.

Usı baǵdardaǵı jumıslardıń dawamı retinde ulıwma orta bilim beriw mekteplerinde jumıs islep atırǵan kitapxana baslıqlarınıń kásiplik sheberligin rawajlandırıw, olardıń óz ústinde islewi ushın imkaniyat jaratıw, kitap oqıwǵa qızıǵıwshılıǵın arttırıw hám ele de jetilistiriw, óz-ara tájiriybe almasıw jumısların muwapıqlastırıw, málimleme kommunikaciya texnologiyalarınan paydalanıw boyınsha kónlikpelerin rawajlandırıw sonday-aq, dóretiwshilik belsendiligin arttırıw maqsetinde ministrliktiń baslaması menen mektep kitapxana baslıqları arasında tańlawdıń rayon (qala)lıq basqıshı ótkerilgen edi.
Tańlawǵa rayon (qala)lıq basqıshında jeńimpaz bolǵan 15 ulıwma bilim beriw mektep kitapxana baslıqları Qaraqalpaqstan Respublikası basqıshında óz-ara bellesti. Tańlaw shártleriniń orınlanıwı tóreshiler tárepinen ádil bahalanıp barılıp, onda Moynaq rayonı 4-sanlı ulıwma bilim beriw mektebiniń kitapxana baslıǵı P. Karabekova birinshi, Qanlıkól rayonı 22-sanlı ulıwma bilim beriw mektebi kitapxana baslıǵı D. Dauletbaeva ekinshi, Taqıyatas rayonı 16-sanlı ulıwma bilim beriw mektebi kitapxana baslıǵı G. Beketovalar úshinshi orınlardı iyeledi.
– Jas áwladqa kitap oqıwdı úyretiw hám olardıń qızıǵıwshılıǵın arttırıw ushın birinshi ustazlar menen kitapxanashılar tereń bilimge iye bolıwı kerek. Húrmetli Prezidentimiz tárepinen kitapqumarlıqtı arttırıw boyınsha kóplegen imkaniyatlar, sharayatlar jaratılıp berilmekte. Biz bul imkaniyatlardan orınlı paydalanıp, keleshek áwladtı social tarmaqlardan orınsız paydalanıwına jol qaymay, olardı kitap oqıw mádeniyatına úyretip barsaq jaqsı nátiyjelerge erisemiz, – deydi tańlawdıń birinsh orın jeńimpazı P.Karabekova.
Tańlaw juwmaǵında jeńimpazlar húrmet jarlıǵı hám estelik sawǵalar menen sıylıqlandı.

Qaraqalpaqstan xabar agentligi