Berdaq atındaǵı Qaraqalpaq mámleketlik universitetinde Ózbekstan Respublikası Ilimler akademiyasınıń Qaraqalpaqstan bólimi menen birgelikte akademiyalıq licey oqıwshıları arasında ximiya páninen «Akademik kubogi» olimpiadası shólkemlestirildi.

Bul ilaj qábiletli jaslardı qollap-quwatlaw, olardıń ilimge bolǵan qızıǵıwshılıǵın hám izleniwsheńlik ruwxın jáne de kúsheytiw, sonday-aq, xalıqaralıq hám respublikalıq kólemdegi pán olimpiadalarına tayarlıq procesin jetilistiriwge qaratılǵan áhmiyetli ilimiy-aǵartıwshılıq platformaǵa aylandı.
Olimpiadanıń ashılıw máresiminde Qaraqalpaq mámleketlik universiteti rektorı wazıypasın waqtınsha atqarıwshı O.Duysenbaev hám Ózbekstan Respublikası Ilimler akademiyası Qaraqalpaqstan bólimi baslıǵı, akademik A.Reymovlar shıǵıp sóylep, mámleketimizde jaslardıń bilim alıwı hám ilimiy potencialın arttırıwǵa úlken itibar qaratılıp atırǵanın atap ótip, bul olimpiada jas ximiklerdiń óz bilim hám qábiletin kórsetiwi ushın áhmiyetli maydan bolatuǵınına toqtaldı hám barlıq qatnasıwshılarǵa tabıslar tiledi.
-Bul áhmiyetli ilaj Ózbekstan Respublikası Prezidentiniń 2020-jıl 3-dekabrdegi “Qábiletli jaslardı tańlap alıw sistemasın hám akademiyalıq liceyler jumısın jetilistiriw ilajları haqqında”ǵı PQ-4910-sanlı qararı, sonday-aq, 2020-jıl 12-avgusttaǵı “Ximiya hám biologiya tarawlarında úzliksiz bilimlendiriwdiń sapasın hám ilim nátiyjeliligin arttırıw ilajları haqqında”ǵı PQ-4805-sanlı qararlarında belgilengen wazıypalardıń orınlanıwın támiyinlew maqsetinde shólkemlestirildi. – deydi akademik Axmed Reymov.
Olimpiada procesinde akademiyalıq liceylerdiń eń qábiletli oqıwshı-jasları ximiya páni boyınsha teoriyalıq hám ámeliy baǵdarlarda óz bilimlerin sınaqtan ótkerdi. Olar ushın arnawlı quramalı sorawlar, laboratoriyalıq shınıǵıwlar hám ximiyanıń zamanagóy baǵdarları boyınsha tapsırmalar tayarlandı. Bul bolsa, oqıwshılardıń tek sabaqlıq sheńberindegi bilimlerin emes, al logikalıq pikirlew, tallaw, ilimiy izleniw alıp barıw kónlikpelerin de tekseriwge xızmet etedi.
Ótkerilgen olimpiada sońında, birinshi orındı QMU janındaǵı Akademiyalıq liceydiń tábiyiy pánler baǵdarı 2-kurs oqıwshısı Fatima Jienbaeva iyelewge miyasar boldı.
Al, ekinshi hám úshinshi orınlardı NMPI janındaǵı Akademiyalıq liceydiń 2-kurs oqıwshısı Ayzada Sarsenbaeva hám QMU janındaǵı Akademiyalıq liceydiń 2-kurs oqıwshısı Gúlayım Joldasbaevalar jeńip alıwǵa eristi.
Jeńimpaz oqıwshılar shólkemlestiriwshiler tárepinen tayarlanǵan arnawlı diplom hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı