7-10-dekabr kúnleri Nókis qalasında jaslar arasında Ózbekstan kubogi jarısı bolıp ótti. Jarısta mámleketimizdiń barlıq aymaqlarınan 300 den aslam sportshılar belbewli gúrestiń klassikalıq hám erkin baǵdarında kúsh sınastı.

Nókis olimpiada hám paralimpiada sport túrlerine tayarlaw orayında bolıp ótken keskin bellesiwlerde respublikamızdan qızlar arasında Shahlo Qalmuratova, Jasmina Oralbaeva hám Aysulıw Qıdırbaevlar barlıq qarsılasların jeńip shıǵıp, altın medal iyesine aylandı. Al, Araylım Sharapovaǵa gúmis, Nargiza Saatdinova, Húrliman Niyazımbetova, Madina Niyetbaeva, Ásemay Makunova, Alfiya Nuratdinovalarǵa qola medalı nesip etti.
Al, jigitlerimizge altın medal alıw nesip etpey, olar óz salmaq kategoriyaları boyınsha ekinshi hám úshinshi orınlardı iyelewge miyasar boldı. Atap aytqanda, Asadbek Imangaliev, Isabek Biysenbaev, Janarıs Shınbatırov, Balmurat Aymuratov, Rinat Muratbaevlar gúmis, Dáwran Jumamuratov, Áliy Ilyasov, Baxtıbay Seyitırzaev, Sherzad Medetbaev, Alpamıs Jańabaev, Temirxan Isakov, Salamat Purxanatdinov, Musa Jumamuratov, Quralbay hám Jasur Muratbaevlar qola medalları menen sıylıqlandı.
Jas palwanlarımızdı jarısqa Gúlshad Ótemuratova, Anvar Satniyazov, Nurlıbek Erejepov, Shıńǵıs Biyimbetov, Albina Allambergenova, Qarshıǵa Boranbaev, Beket Qaljanbaev, Rustem Jumabaev, Ilyas Seytmuratov, Asılbek Sariev, Bókenbay hám Eset Sadwaqasovlar tayarladı.
Ulıwma komandalıq esapta bolsa, Ándijan wálayatı birinshi, Namangan wálayatı ekinshi orındı iyelegen bolsa, respublikamız komandasına úshinshi orın nesip etti.
Jarıs juwmaǵında jeńimpazlar diplom, medal hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı