Jańalanǵan Konstituciyada “Puqaralıq jámiyeti institutları” dep atalǵan óz aldına bap bar. Oǵan bola, puqaralıq jámiyeti institutları, sonıń ishinde, jámiyetlik birlespeler hám basqa da mámleketlik emes kommerciyalıq emes shólkemler, puqaralardıń ózin-ózi basqarıw uyımları, ǵalaba xabar quralları puqaralıq jámiyetiniń tiykarın quraydı.

Puqaralıq jámiyeti institutlarınıń jumısı nızamǵa muwapıq ámelge asırıladı.

Bul konstituciyalıq reformalar elimizde puqaralıq jámiyetleri institutlarınıń rawajlanıwına keńnen jol ashtı.
Oliy Majlis Senatında “Puqaralıq jámiyeti hápteligi” sheńberinde ótkerilgen ushırasıwda bul haqqında sóz boldı.
Senattıń Sud-huqıq máseleleri hám korrupciyaǵa qarsı gúresiw komitetiniń baslıǵı Abdulhákim Eshmurodov mámleketlik basqarıwǵa jámiyetshilikti keńnen tartıw, puqaralardıń baslamaların qollap-quwatlaw hám mámleketlik emes sektor jumısı ushın qolaylı sharayat jaratıw demokratiyalıq qádiriyatlardı bekkemlewge xızmet etip atırǵanın atap ótti.
Puqaralıq jámiyeti institutları bolsa xalıqtıń talapların sáwlelendiriwshi hám mámleket penen jámiyet arasında kópir wazıypasın atqarıwshı áhmiyetli mexanizmge aylanıp barmaqta.
“Ózbekstan – 2030” strategiyasında da mámleketlik basqarıwdı xalıqqa xızmet etiwdi támiyinlewge baǵdarlaw, jámiyetlik basqarıwdı jetilistiriw tiykarǵı baǵdarlardan biri sıpatında belgilep qoyılǵan.
Elimiz tariyxında birinshi márte 2021-2025-jıllarǵa mólsherlengen Puqaralıq jámiyetin rawajlandırıw koncepciyasınıń qabıl etiliwi de bul baǵdardaǵı reformalardıń izbe-iz dawam etip atırǵanınan derek berip tur.
Ilajda Ózbekstanda puqaralıq jámiyetin rawajlandırıw boyınsha nızamshılıqtaǵı ózgerisler hám puqaralıq jámiyeti institutlarınıń milletleraralıq tatıwlıq, keńpeyillik hám xalıqaralıq birge islesiwdi bekkemlewdegi ornı boyınsha pikir alısıldı.
Puqaralıq jámiyeti institutlarınıń milletleraralıq tatıwlıq hám keńpeyillikti bekkemlewdegi ornı ayrıqsha atap ótildi. MKSh jumısın qollap-quwatlaw, jámiyette puqaralıq belsendiligin arttırıw hám jámáátlik birge islesiwdi kúsheytiwge baylanıslı usınıslar bildirildi.

N.Abduraimova, ÓzA