Bozataw rayonında “Abat shańaraq”, “Abat kóshe” hám “Abat máhálle” tańlawınıń rayonlıq basqıshı ótkerildi.

Tańlawda rayondaǵı máhálle baslıqları, kóshe biyleri hám abat shańaraq iyeleri qatnasıp, óz aymaqlarında ámelge asırılıp atırǵan abadanlastırıw jumısları, úlgili shańaraq hám kósheler boyınsha ózleriniń is-tájiriybelerin slaydlar arqalı tóreshiler komissiyasına ámeliy túrde kórsetip hám túsindirip berdi.

– Bunday tańlawdıń shólkemlestiriliwi rayonımız turǵınları ushın úlken motivaciya boldı, – deydi Ózbekstan Respublikası Máhálleler awqamı Bozataw rayonlıq bóliminiń baslıǵı Quralbay Qayıpov. – Sebebi, xalqımız tańlawda múnásip túrde qatnasıw ushın háreket etip, ózleriniń úy aldı qıytaq jerlerin kóklemzarlastırıw, átirap aymaqtı abadanlastırıw islerine ayrıqsha itibar qaratpaqta. Búgingi ótkerilgen tańlaw bunıń ayqın dáliyli boldı dep ayta alamız.
Ótkerilgen tańlaw juwmaǵında, “Abat máhálle” nominaciyası boyınsha Kók-suw awıl puqaralar jıyını, “Abat kóshe” nominaciyası boyınsha Erkindárya awıl puqaralar jıyını aymaǵındaǵı “Sarı oymawıt” kóshesi hám “Abat shańaraq” nominaciyası boyınsha Bozataw posyolkalıq puqaralar jıyını turǵını R.Ismamutovtıń shańaraǵı jeńimpaz dep tabılıp, shólkemlestiriwshiler tárepinen arnawlı diplom hám estelik sawǵaları menen sıylıqlandı.
Sonday-aq, jeńimpazlar tańlawdıń Qaraqalpaqstan Respublikası basqıshına jollamanı da qolǵa kirgizdi.

Adilbay Orazov,
Qaraqalpaqstan xabar agentligi sholıwshısı