Ózbekstan Sawda-sanaat palatası Qaraqalpaqstan Respublikası basqarmasında Qaraqalpaqstan Respublikasında turizmdi rawajlandırıw boyınsha Oliy Majlis janındaǵı Jámiyetlik fondtıń sociallıq buyırtpası tiykarında ámelge asırılıp atırǵan Muwapıqlastırıwshı keńes májilisi hám “QR Gastronomic Quality” joybarınıń prezentaciyası bolıp ótti.

Májiliste Qaraqalpaqstan Respublikası Ministrler Keńesi Baslıǵınıń orınbasarı R.Zarikeev, mámleketlik uyımlar, turizm tarawı hám gastronomiyalıq biznes wákilleri, jámiyetlik shólkemler qatnastı.
Ilaj dawamında R.Zarikeev aymaqtıń turizm potencialın arttırıwda sistemalı qatnas hám xızmetlerdiń sapasın jaqsılaw áhmiyetli ekenligin atap ótti.
Májiliste Ózbekstan Respublikası Oliy Majlisi janındaǵı Jámiyetlik fondtıń sociallıq buyırtpası tiykarında ámelge asırılıp atırǵan “QR Gastronomic Quality” joybarı haqqında maǵlıwmat berildi.
Joybardıń tiykarǵı maqseti – Qaraqalpaqstanda gastronomiyalıq turizmdi rawajlandırıw, xızmetlerdiń sapasın bahalaw hám arttırıw ushın sanlı bahalaw sistemasın engiziw bolıp tabıladı.
Májiliste Keńes quramın qáliplestiriw, Mámleketlik uyımlar, biznes hám mámleketlik emes kommerciyalıq emes shólkemler arasında birge islesiw mexanizmlerin jolǵa qoyıw, joybardıń turaqlılıǵın hám monitoring sistemasın támiyinlew máseleleri dodalandı.
Májiliste Muwapıqlastırıwshı keńestiń jumıs rejesi tastıyıqlanıp, regionallıq hám xalıqaralıq birge islesiw baǵdarları belgilep alındı.

Qaraqalpaqstan xabar agentligi