“Lockheed Martin” kompaniyası tarqatqan baspasóz xabarlamasında NASA menen birgelikte jaratılǵan X-59 markalı dawıstan da tez ushatuǵın samolyottıń dáslepki sınaq ushıwı tabıslı juwmaqlanǵanı málim etilgen.

Atap ótiliwinshe, bul samolyot Kaliforniyanıń Palmdeyl qalasındaǵı 42-hawa kúshleri bazası aymaǵındaǵı “Skunk Works” zavodınan Edvards qalasındaǵı NASAǵa qaraslı Armstrong izertlew orayınıń janında jaylasqan qonıw ornına ushqan.
– X-59 reje boyınsha anıq isledi, belgilengen mánzilge qáwipsiz qonıwdan aldın párwaz qásiyeti hám aerodinamika kórsetkishin tastıyıqladı, – delingen kompaniya málimlemesinde.
Dawıstan da tez ushıw texnologiyasın kórsetiwi názerde tutılǵan bul samolyot ses soqqısın jumsartadı. Bunday texnologiyanıń engiziliwi jolawshı hám júkti házirgi hawa laynerlerine qaraǵanda eki ese tez tasıy alatuǵın jańa áwlad qurılmasın jaratıwǵa jol ashadı.
Kelesi aylarda “Lockheed Martin” NASA menen birgelikte birinshi haqıyqıy párwazdı ámelge asırıwdı rejelestirgen. Usı waqıt ishinde samolyot múmkin bolǵan eń joqarı tezlik hám biyiklikke erisiwi kútilmekte.

S.Rahimov, ÓzA