Samarqand qalasında ótkeriletuǵın YuNESKO Bas konferenciyasınıń 43-sessiyasına tayarlıq kóriw boyınsha shólkemlestirilgen shtabta házirgi waqıtta ámelge asırılıp atırǵan jumıslar juwapkerlerdiń qatnasıwında dodalandı.

Húkimet shólkemlestiriw komitetiniń aǵzası, bas shtab baslıǵı A.Ikromovtıń basshılıǵında ótkerilgen májiliste xalıqaralıq konferenciyaǵa tayarlıq boyınsha tiyisli jumısshı toparlar tárepinen usı waqıtqa shekem ámelge asırılǵan jumıslar tallanıp, aldaǵı wazıypalar belgilep alındı.
Atap aytqanda, sessiya qatnasıwshıları hám miymanlardıń elimizge kelip-ketiwi ushın arnawlı aviareysler shólkemlestiriw, “Tashkent – Samarqand” hám “Samarqand – Tashkent” jónelisinde qosımsha aviaqatnaw hám poezd qatnawların jolǵa qoyıw, miymanxanalardı tayarlaw, tiykarǵı sessiya hám ilajlar jáne mádeniy baǵdarlamalar ótkeriletuǵın orınlardı úskenelew, miymanlarǵa húrmet kórsetetuǵın juwapkerler hám gid-ekskursovodlar menen islesiw, baspasóz orayın shólkemlestiriw sıyaqlı máseleler boyınsha juwapkerlerdiń málimlemeleri tıńlandı.
Sessiya hám onıń sheńberindegi ilajlarda qatnasatuǵın abıraylı delegaciyalar, xalıqaralıq shólkemlerdiń basshıların kútip alıw jáne olar qatnasatuǵın ilajlar baǵdarlamaların puqta islep shıǵıw zárúr ekenligine itibar qaratıldı.
Sonday-aq, májiliste Samarqand wálayatı hám qalası hákimlikleri tárepinen ánjumanǵa tayarlıq sheńberinde alıp barılıp atırǵan jumıslar tallandı. Shtabtıń jumısın kúsheytiw hám oǵan biriktirilgen ministrlikler hám uyımlar, shólkemler xızmetkerleriniń juwapkershiligin arttırıw zárúr ekenligin atap ótti.

Ǵ.HASANOV, ÓzAnıń xabarshısı