Búgin Oraylıq Aziya xalıqaralıq institutı (OAXI) baslaması menen Shanxay xalıqaralıq izertlew institutı (ShXII) járdeminde “Ózbekstan – Qıtay birge islesiwi: “Oraylıq Aziya – Qıtay Xalıq Respublikası” hám Shanxay birge islesiw shólkemi formatlarındaǵı imkaniyatlar” temasında dógerek sáwbeti ótkeriledi.

Ushırasıwǵa eki mámleket diplomatiyalıq korpus wákilleriniń, sonday-aq, jetekshi tallaw orayları, joqarı bilimlendiriw mákemeleri wákilleriniń qatnasıwı kútilmekte.
Bul ilaj táreplerge eki platforma sheńberindegi strategiyalıq birge islesiwdi hár tárepleme tallaw imkaniyatın beredi. Dodalawlar waqtında Astana hám Tyanczinde ótkerilgen sammitlerdiń nátiyjesi, bul ánjumanlardıń Oraylıq Aziyadaǵı regionallıq birge islesiw hám turaqlı rawajlanıw procesine tásiri úyreniledi.
Sóylesiw sheńberinde qatnasıwshılar siyasiy, ekonomikalıq, mádeniy hám gumanitarlıq tarawlardaǵı birge islesiwdiń házirgi jaǵdayı hám perspektivaların kórip shıǵadı. Dodalawlar regionallıq qáwipsizlikti bekkemlew, ekspert toparların rawajlandırıw, jaslar baslamaların qollap-quwatlaw hám turaqlı ósiw mexanizmin jetilistiriw sıyaqlı áhmiyetli máselelerdi qamtıp aladı.
Ilaj juwmaǵında OAXI hám ShXII arasındaǵı birge islesiw kólemin bunnan bılay da keńeytiwdi názerde tutatuǵın Memorandumǵa qol qoyılıwı rejelestirilgen.

Ǵ.Xonnazarov, ÓzA