Сенаттың жалпы мәжилисинде Қытайдың Тяньцзин қаласында болып өткен Шанхай бирге ислесиў шөлкеми (ШБШ) шеңбериндеги жоқары дәрежедеги сөйлесиўлердиң әҳмийетине итибар қаратылды.

Сенат Баслығы Танзила Норбоева абырайлы илажда Президентимиз бир қатар усыныс ҳәм басламаларды алға қойғанын атап өтти.

Соның ишинде, саўданы әпиўайыластырыў, өндирис-логистика шынжырларын раўажландырыў ҳәм өз-ара инвестицияларды хошаметлеў, “жасыл” энергетиканы жедел раўажландырыў, стартап ҳәм инновациялық жойбарларды қоллап-қуўатлаў және алға қойыў, регионаллық санаат ҳәм инфраструктура жойбарларын қаржылай қоллап-қуўатлаў, регионлараралық транспорт-транзит потенциалын толық иске қосыў, ШБШда бирден-бир транспорт тармағын қәлиплестириў, “жасыл” трансформация тараўындағы бирге ислесиўди кеңейтиў сыяқлы әҳмийетли мәселелер ШБШ мәканының раўажланыўында үлкен әҳмийетке ийе.

Жақында Түркменстанның Аваза қаласында болып өткен БМШтың Теңизге шығыў имканияты болмаған раўажланып атырған мәмлекетлер бойынша үшинши конференциясы да бул жолдағы ҳәрекетлерди бирлестириў ушын әҳмийетли сөйлесиў майданы болып хызмет етти.

Мәмлекетимиз басшысы тәрепинен алға қойылған усыныс ҳәм басламалар теңизге шығыўға ийе болмаған басқа онлаған раўажланып атырған мәмлекетлердиң турақлы раўажланыўының фундаментал мәселелери аўызбиршиликте шешилиўине хызмет етеди.

Ҳәзирги ўақытта регионымызда бирден-бир транспорт-логистика мәканын қәлиплестириў, Орайлық Азияны Шығыс ҳәм Батыс, Арқа ҳәм Қубла арасындағы толық транзит хабына айландырыў бойынша кең көлемли бағдарламалар, ири жойбарлар әмелге асырылмақта. Кейинги жыллары өз-ара саўда көлеми 4,5 есеге, инвестициялар болса еки есеге өскен. Биргеликтеги кәрханалардың саны бес есеге көбейген. Бундай ҳәрекетлер халықларымыздың турмысы және де абадан болыўына хызмет ететуғыны сөзсиз.

Авазада болып өткен “Әзербайжан – Түркменстан – Өзбекстан” саммити де регионымызда өз-ара исеним ҳәм бирге ислесиў байланысларын беккемлеў, турақлы раўажланыў имканиятларын бирлестириў жолындағы гезектеги әҳмийетли қәдем болды.

Улыўма алғанда, регион мәмлекетлери басшылары, биринши гезекте, Президентимиздиң ис-ҳәрекетлери менен Орайлық Азия ҳәм Түркий дүньяда өз-ара исеним ҳәм шериклик жаңа дәрежеге көтерилгени ҳәм ерисилип атырған табыслар глобаллық дәрежеде тән алынбақта.

Мәмлекетимиз басшысына Түркменстанның жоқары мәмлекетлик сыйлығы – “Бирге ислесиўди раўажландырыўға қосқан үлеси ушын” ордениниң берилгени мине усындай тән алыўлардың айқын дәлили болды.

Норгул Абдураимова, ӨзА