Vena qalasında Ózbekstan – Avstriya qatnasıqların rawajlandırıwǵa qaratılǵan ilajlar shólkemlestirildi. Sonıń ishinde, Sawda-sanaat palatası baslıǵınıń birinshi orınbasarı Davronbek Qurbonov basshılıǵındaǵı delegaciya Avstriya Parlamentinde nátiyjeli sóylesiwler ótkerdi.

Sóylesiwlerde Avstriya Xalıq demokratiyalıq partiyası frakciyasınıń basshısı Karl Renner hám Avstriya Ekonomikalıq palatasınıń aǵzası Gunter Fexlindjer qatnastı. Delegaciyaǵa mámleketimizdiń Avstriyadaǵı elshisi Baxtiyor Ibrohimov basshılıq etti.
Sóylesiw aldınan delegaciyamız aǵzaları sapar dawamında Avstriyadaǵı biznesti qollap-quwatlawshı shólkemlerdiń wákilleri menen bir qatar ushırasıwlar ótkerilgeni, nátiyjede áhmiyetli kelisimlerge erisilgenin atap ótti.
Karl Renner bolsa Avstriya parlamentarizmi tariyxı hám nızam shıǵarıw procesi haqqında maǵlıwmat berdi. Ol sońǵı jıllarda Ózbekstanda ámelge asırılıp atırǵan ekonomikalıq reformalardı joqarı bahalap, Avstriya mámleketimizdiń Jáhán sawda shólkemine aǵza bolıw procesin qollap-quwatlaytuǵının bildirdi.
Gunter Fexlindjer Ózbekstan sapalı keptirilgen miyweler eksportında úlken imkaniyatlarǵa iye ekenin hám bul ónimler Avstriya bazarında joqarı talapqa iye bolatuǵının atap ótti.
Bul usınıs maqullanıp, Ózbekstan Sawda-sanaat palatası avstriyalı sheriklerge isenimli jergilikli sherikler tabıw hám joybarlaw máselelerin sheshiwde járdem beriwge tayar ekenin bildirdi.
Ushırasıw juwmaǵında eki tárepleme qatnasıqlardı jańa basqıshqa alıp shıǵıw maqsetinde sawda aylanısın arttırıw hám ekonomikalıq baylanıslardı tereńlestiriw boyınsha kelisimge erisildi.

B.XUDOYBERDIEV,
ÓzA