Beruniy rayonında bolıp ótip atırǵan “Ulıwma milliy awızbirshilik Festivalı” sheńberindegi ilajlar elimizde insan qádiri, sociallıq tatıwlıq hám abadan turmıs jolında alıp barılıp atırǵan reformalardıń ámeliy kórinisine aylandı. Bul festivalda Ózbekstan Liberal-demokratiyalıq partiyasınıń deputatları belsene qatnasıp, xalıqtıń sociallıq talapların úyreniw, olardı qollap-quwatlaw jolında nátiyjeli jumıslar alıp barmaqta.

Festival sheńberinde “Insan” sociallıq xızmetler orayı menen birgelikte Beruniy rayonındaǵı Istiqlol máhállesinde imkaniyatı sheklengen balalarǵa mólsherlengen kúndizgi tárbiyalaw xızmetine ámeliy sapar shólkemlestirildi. Bul mákemede tárbiyalanıp atırǵan balalardıń jaǵdayınan xabar alınıp, olardıń rawajlanıwında unamlı ózgerisler baqlandı.

Sonday-aq, Paxtakor máhállesinde “Asadali” JShJ tárepinen úy sharayatında shólkemlestirilgen kúndizgi tárbiya beriw xızmetinde jalǵız, kekseler hám mayıplıǵı bolǵan puqaralarǵa kórsetilip atırǵan xızmetler kózden ótkerildi. Bul jerde 18 jastan úlken xalıq qatlamına 5 túrdegi sociallıq xızmetler kórsetilmekte. “Insan qádiri ushın” súreni astında ótkerilgen sóylesiwler waqtında deputatlar nuranıylar menen qızǵın pikirlesip, olardıń usınıs hám mashqalaların tıńladı.
Jaslar menen islesiw máselesinde de festival sheńberinde áhmiyetli baslamalar ámelge asırıldı. “Abadan turmısqa birinshi qádem” baǵdarlaması tiykarında shólkemlestirilgen biznes treningler arqalı jas áwladqa isbilermenlik kónlikpeleri berildi. Bul processte deputatlar tárepinen jaslardıń ideyaları qollap-quwatlanıp, olarǵa ámeliy másláhátler berildi. Kommerciyalıq bank wákilleri hám isbilermenlerdiń qatnasıwındaǵı seminarlar jaslar ushın paydalı bolıp, olarda úlken qızıǵıwshılıq oyattı.
Festival sheńberinde deputatlar xalıqtıń túrli qatlamları menen tikkeley pikirlesip, olardıń turmısın jaqsılaw, sociallıq qollap-quwatlaw hám isbilermenlikti rawajlandırıw jolında ózleriniń ámeliy jumısların jáne bir márte kórsetti. Bul bolsa partiyanıń xalıqqa jaqın bolıw, onıń máplerine xızmet etiw baǵdarındaǵı tiykarǵı baǵdarların anıq kórsetip bermekte.

Qaraqalpaqstan xabar agentligi