Nókis qalasındaǵı Qutlı qonıs mákan puqaralar jıyınında xalıqtıń densawlıǵın saqlaw tarawında jáne bir qolaylıq jaratılıp, zamanagóy talaplarǵa juwap beretuǵın 11-sanlı shańaraqlıq poliklinikasınıń ashılıw saltanatlı bolıp ótti.

Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Densawlıqtı saqlaw ministri M.Qurbanov, Nókis qalasınıń hákimi A.Daniyarov, sonday-aq, medicina xızmetkerleri hám aymaq turǵınları qatnastı.
Ilajda atap ótilgenindey, sońǵı jıllarda elimizde densawlıqtı saqlaw tarawın túp-tiykarınan jetilistiriw, medicinalıq xızmet kórsetiwdiń sapasın hám nátiyjeliligin arttırıw, jámiyette salamat turmıs tárizin qáliplestiriw, medicina tarawın zaman talapları dárejesine alıp shıǵıw baǵdarında keń kólemli reformalar ámelge asırılmaqta.
Poliklinikada ulıwma ámeliyat shıpakerleri, balalar hám hayal-qızlar shıpakerleri, laboratoriya jáne diagnostika bólimleri jumıs basladı. Zamanagóy medicinalıq úskeneler, qolaylı qabıllaw xanaları hám jaqtı interer nawqaslar ushın jeńillik jaratadı, álbette.
– Jańa imaratqa, zamanagóy qolaylıqlarǵa iye poliklinikanıń ashılıwı biziń ármanımız edi. Burın bunday sharayat ushın qala orayına barıwımızǵa tuwra keletuǵın edi. Al, endi sapalı medicinalıq xızmet úyimizdiń qasında,-deydi máhálle turǵını Jamila Rametullaeva.
– Maǵan eń unaǵanı – balalar bólimi boldı. Endi kishi jastaǵı perzentlerimdi jaqın, taza hám qolaylı jerde kórsetiw imkaniyatım bar. Bul ushın basshılarımızdan minnetdarmız,-deydi jas ana Dilbar Rametullaeva.
Maman qánigeler hár bir nawqasqa individual qatnasta bolıp, bul jerde emlew menen birgelikte profilaktikalıq jumıslarǵa da úlken itibar qaratılmaqta.

Qaraqalpaqstan xabar agentligi