Shımbay rayonındaǵı “Tońmoyın” nasos stanciyasında kórgizbeli seminar ótkerildi,-dep xabar bermekte Suw xojalıǵı ministrliginiń baspasóz xızmeti.

Oǵan Qaraqalpaqstan nasos stanciyaları hám energetika basqarmasınıń juwapkerleri qatnasıp, usı nasos stanciyasında elektr energiyasınan hám nasoslardan nátiyjeli paydalanıw boyınsha ámelge asırılıp atırǵan jumıslar úyrenildi.
Kórgizbeli seminar túrinde ótkerilgen ilajda elektr energiyasın únemlew, nasos stanciyaları agregatların ońlaw, miynetti qorǵaw hám texnika qáwipsizligi jáne nasos stanciyaları átirapında járdemshi xojalıqlardı shólkemlestiriw máseleleri dodalandı. Sonday-aq, qatnasıwshılar bar texnikalıq úskeneler hám agregatlardıń úzliksiz islewin támiyinlew boyınsha tájiriybe almastı.
Ilaj dawamında juwapker qánigeler tárepinen miynetti qorǵaw hám texnika qáwipsizligi boyınsha da tiyisli túsinik jumısları alıp barılıp, bul baǵdardaǵı talaplarǵa ámel etiwdiń áhmiyeti ayrıqsha atap ótildi. Sonıń ishinde, ámeldegi nızamshılıq hám tastıyıqlanǵan instrukciyalarǵa qatań ámel etiw shárt ekenligi atap ótilip, jumıs baslanıwdan aldın orınlanıwı kerek bolǵan talaplar, jumıs procesinde ámel etiletuǵın qáwipsizlik qaǵıydaları, ayrıqsha jaǵdaylarda orınlanıwı kerek bolǵan ilajlar hám jumıs juwmaqlanǵannan keyin orınlanatuǵın háreketler kórgizbeli qurallar járdeminde keńnen túsindirildi.

Qaraqalpaqstan xabar agentligi