Jaslardıń tárbiyası, olardıń keleshekte salamat shańaraq qurıwı hám jámiyette óz ornın tabıwı búgingi kúnde áhmiyetli máselelerden biri bolıp esaplanadı. Ásirese, erte turmısqa shıǵıw hám erte neke menen baylanıslı jaǵdaylardıń aldın alıw, jas óspirimler arasında huqıqbuzarlıqqa qarsı gúresiw baǵdarında alıp barılıp atırǵan jumıslardıń áhmiyeti úlken. Usı maqsette Beruniy rayonında profilaktikalıq ilaj shólkemlestirildi.

Nawayı awıl puqaralar jıyını aymaǵında jaylasqan 47-sanlı ulıwma bilim beriw mektebinde usı máselelerge baǵıshlanǵan dógerek sáwbeti bolıp ótti. Onda mektep oqıwshıları hám olardıń ata-anaları qatnastı, – dep maǵlıwmat beredi rayon hákimligi Málimleme xızmeti bólimi.
Ilajda rayon hákiminiń orınbasarı, Shańaraq hám hayal-qızlar bóliminiń baslıǵı S.Kozieva, huqıq qorǵaw uyımlarınıń wákilleri, máhálle belsendileri hám mektep jámááti qatnasıp, jazǵı dem alıs dáwirinde perzentlerdi qadaǵalawsız qaldırmaw, olardıń bos waqtın mazmunlı shólkemlestiriw, hár qıylı huqıqbuzarlıqlarǵa aralaspawın támiyinlew haqqında hár tárepleme sóz boldı.
Bul ilaj jas óspirimler arasındaǵı huqıqbuzarlıqlardıń aldın alıw, jaslardıń sanasında huqıqıy mádeniyattı qáliplestiriw, shańaraqlıq qádiriyatlardı bekkemlew jolındaǵı háreketlerdiń bir bólegi bolıp esaplanadı. Orınlarda usınday profilaktikalıq ilajlardıń turaqlı ótkeriliwi keleshekte jámiyettegi turaqlılıqqa xızmet etedi.

Qaraqalpaqstan xabar agentligi