Hawa transportı tarawında ekologiyalıq taza texnologiyalar barǵan sayın keńnen qollanılmaqta. 2025-jıldıń iyun ayında AQShtıń Nyu-York qalasında jáne bir áhmiyetli tariyxıy waqıya júz berdi – elektr energiyasında isleytuǵın samolyot birinshi márte tabıslı párwaz etti. Bul joybar Beta Technologies kompaniyasına tiyisli bolıp, ol hawa transportınıń keleshegin ekologiyalıq hám ekonomikalıq jaqtan nátiyjeli baǵdarǵa burıwdı maqset etken.

Elektr-samolyot birinshi márte Djon Kennedi atındaǵı xalıqaralıq aeroportınan aspanǵa kóterildi. Sınaq ushıwı dawamında samolyotta bir pilot hám tórt jolawshı bolǵan. Párwaz 45 minut dawam etti hám tabıslı qonıw menen juwmaqlandı.
Párwazdıń eń dıqqatqa ılayıq táreplerinen biri – onıń oǵada az qárejet penen ámelge asırılǵanı. Beta Technologies maǵlıwmatlarına bola, 45 minutlıq ushıw ushın sarıplanǵan elektr energiyasınıń bahası tek ǵana 7 dollardı quraǵan. Bul dástúriy janılǵı menen salıstırǵanda júdá úlken únemlew bolıp tabıladı.
Bul tabıslı sınaq ushıwı elektr hawa transportı sanaatı ushın áhmiyetli qádem bolıp, keleshekte qısqa aralıqlı ishki párwazlar, hawa taksileri hám júk tasıw tarawlarında keńnen qollanılıwı kútilmekte. Beta Technologies wákilleriniń aytıwınsha, olar jaqın jıllarda usı túrdegi samolyotlardı kommerciyalıq paydalanıwǵa shıǵarıwdı rejelestirmekte.

Madinabonu NASRIEVA,
Anvarxwja AHMEDOV, ÓzAnıń xabarshıları